Erind Cara është njëri nga 17 personat që konsiderohen të shëruar nga koronavirusi, pasi edhe testi i dytë i ka rezultuar negativ.
I riu pret që të largohet nga Spitali Infektiv ditën e enjte, pas 10 ditësh qëndrimi në të. Para se të largohet nga spitali dhe të vetëngujohet për 14 ditë në shtëpi, ai përçon një mesazh për të gjithë qytetarët.
Mesazhi i plotë:
“Coronavirus, kryefjala e çdo bisede në të gjithë boten!
Sot pas 10 ditësh në terapi pranë Spitalit Infektiv në QSUT dhe pas rezultatit të dy testeve që rezultuan negative ndaj Covid-19, mund të them që betejën time e fitova dhe po kthehem në shtëpi i qetë dhe me shëndet të plotë.
Por humba dhe miq të cilët i njoha gjatë kësaj beteje që nuk ia dolën edhe pse luftuan deri në frymën e fundit bashkë me mjekë e infermierë!
Të dashur miq! Unë fitova betejën me Covid-19, por për të fituar luftën duhet kontributi i të gjithëve NE. Nuk kërkohet asgjë e jashtëzakonshme në këtë luftë, por vetëm një gjë, që të gjithë kur nuk e kemi e duam aq shumë: Të qëndrojmë në shtëpi dhe të kalojmë kohë me familjarët tanë.
Më parë kishim qindra justifikime, puna, koha, pamundësia, lodhja etj.
Sot ështe momenti i duhur të japim dhe marrim dashuri, të bisedojmë me njëri-tjetrin, t’u tregojmë sa shumë i duam. Po, po… sa shumë i duam prindërit, motrat, vëllezërit, gjyshërit, miqtë e të gjithë ata me të cilët ne konsumojmë gjënë më të rëndësishme, KOHËN!
Dy fjalë për ata që mendojnë se ky virus është diçka pa rëndësi! Qëndroni në shtëpi !
Ky virus nuk të jep një mundësi të dytë. Shoku im i dhomës ishte një djalë i ri, që nuk kishte asnjë sëmundje të mëparshme, kishte një familje të mrekullueshme, nuk i mungonte asgjë, por ky virus i rëndoi shëndetin. Një frymëmarrje të thellë thjesht kërkonte! Luftoi, luftoi deri në frymën e fundit sepse ishte larguar pa u përshëndetur me askënd, kishte ardhur se nuk ndjehej mirë, siç mund të jemi secili nga ne. Por mbrëmë ai u dorëzua, nuk ia doli dot, la çdo gjë mbrapa dhe koronavirusi e mori pa mëshirë edhe pse ishte i ri dhe i shëndetshëm. PRANDAJ, QËNDRONI NË SHTËPI!
Për disa të rinj të fortë, e të shëndetshëm si unë, qëndroni në shtëpi, mendoni për familjarët tuaj, prindërit, gjyshërit, imuniteti i të cilëve është më i dobët dhe Covid-19 e ka më të thjeshtë për t’i marrë në gjirin e tij.
NDAJ QËNDRONI NË SHTËPI PËR TË DASHURIT TUAJ!
Dy fjalë të sinqerta për njerëzit më të rëndësishëm në këtë luftë, mjekët, infermierët, farmacistët, sanitarët dhe të gjithë ata që shërbejnë dhe kontribuojnë në këtë luftë kundër Covid-19. Ata janë në vijën e parë të kësaj beteje 24/24 për të dhënë më të mirën e tyre edhe pse rreziku është shumë i lartë. Të mendosh se dhe ata kanë lënë çdo gjë, familjen, prindërit, fëmijët, vëllezërit, motrat, për të qenë aty për t’u shërbyer pacientëve të tyre, atyre që nuk e donin këtë virus, por që u erdhi dhe i infektoi. Por do t’u shërbejë dhe atyre që thoshin “Nuk na bën gjë ne Virusi”. Se kur të arrish atje, kërkon vetëm mëshirë, ndihmë dhe përkujdesje, kupton sa e rëndësishme është JETA, por që tani nuk është vetëm në dorën tënde, por të mjekëve, infermierëve, Koronavirusit dhe Zotit lart në qiell, që po na jep sinjalet e tij të kuptojmë sa e rëndësishme është JETA. Këtë gjë e kishim harruar sepse na “mbytën” angazhimet, punët, Facebook, Instagram, kafet dhe gjërat e parëndësishme.
Duhet të qëndrojmë në shtëpi që këta infermierë dhe mjekë të jenë sa më pak të rrezikuar.
Një falenderim i veçantë shkon për stafin e Spitalit Infektiv: Dr.Najadën, Dr.Arjanin, Dr.Gentin etj; infermierët Semi, Dasho, Lukja, Eni, Emanuela e të tjerët”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.