Paskal Siakam është një nga lojtarët më tërheqës në NBA, si nga pikëpamja basketbollistike, ashtu edhe nga ajo romantike apo e së kaluarës së tij. Disa ditë më parë ai ka firmosur një kontratë të majme me Toronton: 130 milionë dollarë për 4 vjet, maksimumi i mundshëm. Pas një paraqitje të jashtëzakonshëm në 2018-19-ën, zbulimi i sezonit nuk ka ndërmend të ndalet në rritjen e tij. “Nuk shoh limite, e ndjej se ky është vetëm fillimi për mua dhe kam shumë për të dhënë. Jam i lumtur kur mendoj për të ardhmen dhe faktin se mund të përmirësohem. Kanë kaluar vetëm 3 vjet nga koha që kam hyrë në NBA dhe nuk mund të ndalem tani”, - thotë kamerunasi.
Siakam nuk e mendon dot veten pa basketbollin, pa mundësinë për të shfrytëzuar çdo ndeshje, çdo stërvitje. Ai ëndërron të bëhet basketbollisti më i mirë në botë. Është paradoksale, kur mendon se kur ishte fëmijë, basketbolli nuk përfaqësonte absolutisht asgjë në jetën e tij. Historia e Siakam ka lindur në Kamerun, në fshatin Bafia, shumë larg dritave të NBA-së. Në fillim ëndërronte të bëhej futbollist, më pas vendosi të studionte për t’u bërë prift, pasi ishte dëshira e madhe e babait të tij Tchamo. Por zemra dhe ambiciet e Paskalit ishin shumë të mëdha për t’u mbyllur në një fat të parashkruar.
Nisi të luante basketboll pa mbushur 14 vjeç, sepse ishte shumë i gjatë për të bërë diçka tjetër. Brenda një kohe të shkurtër u përfshi me mish e me shpirt në këtë sport. E kuptoi menjëherë se ishte basketbolli “bileta” vetëm vajtje drejt së ardhmes më të mirë për të. Fati pastaj ka bërë të vetën. Potencialin e tij e zbuloi në Kanada Luc Mbah, i cili e pa në një fushë gjatë verës së 2011-ës. Vitin pasardhës mori pjesë në “Basketball Without Borders” (basketbolli pa kufij”, ku i impresionoi të gjithë, edhe Masai Ujirin, presidentin e ardhshëm të Toronto Raptors. Kështu, iu dha mundësi për të luajtur në Amerikë. Përvoja me New Mexico State, ku talenti i tij shpërtheu me një mesatare prej 20.3 pikësh për ndeshje, i hapi rrugën për në NBA.
Babai nuk mundi të gëzonte shkëlqimin e tij, pasi humbi jetën në një aksident rrugor në tetor të 2014-ës. Siakam mori një goditje të fortë në shpirt. Toronto i la numrin 27 në “draft 2016”, duke e lënë për një pjesë të mirë të sezonit te Raptor 905, por ai nuk e mori këtë vendim të klubit si mungesë respekti apo besimi. Besoi shumë se ishte mundësia për të nxjerrë në pah vlerat e tij. I çoi Raptors 905 te titulli, duke u shpallur lojtari më i mirë i finaleve. Në sezonin 2017-18 ishte pjesë e zgjedhjeve të trajnerit Dëane Casey. Në vitin e tretë u ngjit në 16.9 pikë për ndeshje dhe u bë një nga lojtarët më rëndësishëm të Raptors, tashmë me Nick Nurse në stol dhe Kawhi Leonard si yllin e skuadrës. Titulli në NBA dhe kontrata e firmosur përfaqësojnë atë që quhet “Canadian Dream”, versioni romantik i “ëndrrës amerikane”.
I zhdërvjellët, shumë i shpejtë dhe me një hapje krahësh prej 222 centimetrash. Shumë i mirë në aspektin teknik, nuk ka asgjë që Siakam nuk di ta bëjë në mënyrë instiktive në parketin e basketbollit. I lindur për këtë lojë. Ta shohësh teksa vrapon aq lehtë në 28 metra dhe të mendosh evoluimin e tij, është një nga spektaklet më të bukura që mund të shijosh në NBA. Në çdo ndeshje shton diçka të re, duke u përmirësuar, pa parë mbrapa. Babai Tchamo jeton brenda tij dhe ndez zjarrin e pasionit. Atë zjarr që e bën koshin e basketbollit kaq personal për të. Por më e mira, siç thotë vetë Siakam, ende nuk ka ardhur.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.