.png)
Gazeta Si – Valbona Xoxa, mamaja e Ajola Xoxes, bashkëshortes së kryebashkiakut Erion Veliaj, është paraqitur paraditen e kësaj të mërkure në ambientet e SPAK.
Ajo ka qëndruar për rreth 1 orë dhe pas daljes nga Prokuroria e Posaçme, nuk ka preferuar të japë asnjë prononcim për mediat.
Sipas të njëjtave burime, ajo është thirrur për të dhënë shpjegime sa i takon hetimeve që po kryen SPAK në lidhje me pasurinë e Erion Veliajt dhe bashkëshortes së tij, Ajola Xoxa.
Ndërkohë, këtë mëngjes është paraqitur në SPAK edhe biznesmeni Gentian Sula. Ai nuk pati një komunikim me median pas përfundimit të dëshmisë.
Ndaj biznesmenit Sula është caktuar masa e sigurisë “detyrim për t’u paraqitur” të premten e parë dhe të katërt të çdo muaji në orën 14:00.
Ai akuzohet nga SPAK si i dyshuar për kryerjen e veprës penale të “Korrupsioni aktiv i funksionarëve të lartë shtetërorë ose të zgjedhurve vendorë” në lidhje me hetimet në dosjen e kryebashkiakut Erion Veliaj.
Dy ditë më parë, Ajola Xoxa rrëzoi akuzat e SPAK për blerje 800 mijë euro fustave dhe bizhu: “Në 10 vitet e fundit, për blerje online kam shpenzuar 75 mijë euro dhe jo 800 mijë”.
Bashkëshortja e Veliajt në reagimin e saj të parë lidhur me dyshimet e ngritura nga SPAK për të dhe bashkëshortin e saj, thotë se shifrën që akuzohet se e ka shpenzuar për veshje e bizhuteri e ka mësuar nga media 1 ditë përpara gjyqit për vlerësimin e masës.
“Të gjithëve ju që më lexoni, ju kërkoj të parafytyroni vetëm faktin që unë jam e hetuar, por jo e pandehur, pavarësisht se e dënuar dhe e ekzekutuar pa gjyq në gjyqin e politikës, medias dhe rrjeteve sociale. Totali i blerjeve të mija online që përfshijnë veshje, produkte kozmetike dhe parafarmaceutike, aksesorë, etj. (duke mos përfshirë libra, tarifa dixhitale, abonime) është për 10 vite: 75,025 Euro në total (1.1.2015 – 1.1.2025). E kam të qartë që shumëkujt edhe kjo shifër mund t’i duket e madhe, por dua ta theksoj me këtë rast se unë nuk kam lidhje me imazhin e asaj kukullës me 800 mijë Euro fustane dhe bizhu, sepse punoj si juriste dhe avokate prej 17 vjetësh. Punoj edhe si kuratore apo drejtoreshë artistike e vizuale.”
Duke e cilësuar këtë shifër si një “bllof të dhunshëm”, Ajola Xoxa thotë se pafajësinë e saj do ta kërkojë deri në Gjykatën e Strasburgut.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
