Gazeta Si- Pas pushtimit të qytetit të Alepos, grupet e armatosura siriane zbritën nga veriu në jug për më shumë se njëqind kilometra dhe pushtuan qytetin e Hamës pas luftimeve intensive, por të shkurtra kundër forcave të Asadit.
Grupet kryengritëse njoftuan se kishin marrë komandën qendrore të policisë dhe kishin hapur dyert e burgut të Hamës për të lejuar të burgosurit të largoheshin.
Të gjithë konsiderohen si të burgosur politikë, të cilët kishin përfunduar në qeli, sepse ishin kundërshtarë të regjimit.
Ushtria siriane tha se ishte tërhequr nga Hama me 350 mijë banorë “për të shmangur një betejë urbane dhe për të shpëtuar jetën e civilëve”.
Është një deklaratë që tingëllon si një pretekst, sepse ushtria nuk ka bërë kurrë një dallim midis luftëtarëve dhe civilëve që nga fillimi i konfliktit në 2011.
Ka kaluar një javë që kur grupet e armatosura filluan ofensivën e tyre ushtarake kundër regjimit të Presidentit Bashar al Assad dhe lufta tashmë ka lëvizur nga Siria veriore në Sirinë qendrore.
Nuk kishte ndodhur kurrë më parë që kaq shumë territor të kalonte nga njëra anë në tjetrën në një kohë kaq të shkurtër që nga fillimi i luftës në 2011.
Gjatë natës mes të mërkurës dhe të enjtes, grupet e armatosura ishin pozicionuar në veri, lindje dhe perëndim të Hama-s, sikur donin ta rrethonin atë dhe nuk u përpoqën të mbyllnin anën jugore.
Ata donin të linin një rrugë shpëtimi për trupat e Asadit të stacionuara në qytet.
Milicët kanë parë ditët e fundit që ushtarët e ushtrisë siriane ndonjëherë braktisin pozicionet e tyre pa gjuajtur asnjë të shtënë dhe kanë një interes të dukshëm për të inkurajuar këtë model sa më shumë që të jetë e mundur.
Lënia hapur e anës jugore të Hamës ishte një ftesë e heshtur për ushtarët e Asadit për të ikur në drejtim të Damaskut dhe kjo është ajo që ndodhi.
Ditët e fundit, në mediat sociale siriane janë shfaqur njoftime të reja për regjistrimin në milicitë “asadiste” në zonën e Hamës – të cilët luftojnë përkrah ushtrisë – dhe premtojnë shumë para.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
