Ministrja e Infrastrukturës dhe Transporti, Belinda Balluku e cilësoi grevën e kontrollorëve të trafikut ajror në aeroportin e Rinasit si grusht shteti pas të cilit qëndrojnë motive politike.
Balluku doli në një konferencë për shtyp pas takimit që pati me kontrollorët dhe përfaqësues së sindikatës së tyre, ku akuzoi Sali Berishën dhe Ilir Metën që qëndronin pas kësaj greve për shkaqe elektorale.
"Kam ndjekur me vëmendje Sali Berishën i cili ka një ekzaltim të madh, sepse do të mbyllet aeroporti i vetëm ndërkombëtar. E gjitha kjo është një organizim i mirëfilltë politik për shkak të fushatës. Unë do t'i kërkoja Presidentit të Republikës i cili i ka takuar më parë i ka takuar dhe i ka informacion kontrollorëve të trafikut ajror. Do të doja të dija nga zoti Meta a mendon se do të duhet të bllokohet ardhja e vaksinave? A duhet vendi të kapet peng? Ky është një grusht shtetit! A duhet të kapet peng shteti nga disa persona të cilat janë të stresuar me pagën 2490 dollarë dhe nëse nuk ja bëjnë 4490 dollarë?”, deklaroi Balluku.
Ministrja tha se shteti shqiptar nuk është i përfshirë financiarisht te pagesat e kontrollorëve, pasi ata paguhen nga të ardhurat e siguruara nga Eurocontrol. Balluku foli për një përpjekje të organizatorëve për të mos e cilësuar grevë këtë protestë, pasi greva u ndalohet me ligj. Ajo paralajmëroi pasoja ligjore.
“Këtu kemi një grevë të pastër që është në shkelje të të gjitha rregullave dhe ligjeve të vendit. Është një mënyrë e pashoqe dhe duke u kujdesur që të mos quhet grevë, por në fakt është grevë. Pashë sot gjatë takimit njerëz që kërkonin të qëndronin në mbledhje dhe punë. Por, pashë të tjerë që të bullonin hapur shokët për t’i nxjerrë nga salla dhe për të dhënë që mbaruam dhe nuk plotësohen kërkesat tona. Është situatë e cila futet në cenimin e sigurisë kombëtare dhe cenimin e së drejtës së lëvizjes. Nga ky moment do të ketë marrje masash ligjore dhe ndëshkim dhe u bëj thirrje të gjithë kontrollorëve që të kthehen në detyrë gjatë ditës së sotme që të rikthehen në punë”, tha ajo.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.