.png)
Gazeta Si – Një ditë pas protestës të zhvilluar para Kuvendit (2 korrik 2026), ku pati incidente dhe bllokime rrugësh, 19 persona janë arrestuar nga policia dhe 12 u proceduan penalisht në gjendje të lirë.
Sipas njoftimit zyrtar, të arrestuarit akuzohen se kanë kundërshtuar dhe goditur me sende të forta punonjësit e policisë, kanë dëmtuar një automjet policie, si edhe kanë sulmuar deputetë të Kuvendit.
Mes të arrestuarve është edhe shtetasi A. Ll., 35 vjeç, i cili dyshohet se ka goditur një gazetar gjatë protestës.
Policia bën të ditur se gjatë tubimit mbetën të lënduar 15 punonjës policie, ndërsa u dëmtua edhe një automjet i policisë.
Në kuadër të hetimeve janë proceduar penalisht edhe 12 shtetas të tjerë, ndërsa grupi hetimor vijon punën për identifikimin e gjashtë personave të tjerë, të dokumentuar me pamje filmike duke kryer veprime të dhunshme gjatë protestës.
Sipas autoriteteve, hetimet do të vazhdojnë edhe për identifikimin e personave të tjerë që mund të kenë kryer veprime të kundërligjshme gjatë tubimit.
Materialet procedurale i janë referuar Prokurorisë së Tiranës për veprat penale “Shkatërrim prone”, “Kundërshtim i punonjësit të policisë”, “Goditje për shkak të detyrës”, “Prishje e rendit dhe e qetësisë publike”, “Organizim dhe pjesëmarrje në grumbullime dhe manifestime të paligjshme”, “Mosbindje ndaj urdhrit të ligjshëm të punonjësit të policisë” dhe “Pengim i qarkullimit të mjeteve të transportit”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje