Sipas raportit të Shoqatës Shqiptare të Bankave, gjatë vitit 2020, rreth 23.000 biznese dhe familje shqiptare përfituan nga masat lehtësuese, në vlerën e rreth 200 miliardë lekëve kredi në banka me 0.5% normë bazë interesi. Kjo lidhet me masat që Banka e Shqipërisë mori gjatë kohës së pandemisë, duke ulur nivelin e normës në minimalen historike të vendit.
Nga 12 banka tregtare në vendin tonë, 4 janë me kapital shqiptar dhe 8 me kapital të huaj. Ato me kapital shqiptar janë Abi Bank, Tirana Bank, pjesërisht Credins Bank dhe UBA. BSH-ja ndaloi edhe shpërndarjen e fitimeve të bankave të nivelit të dytë deri në qershor 2021.
Për të gjithë vitin e shkuar, inflacioni mesatar vlerësohet në 1.6%. BSH-ja vendosi objektivin për një inflacion 3% për shkak të pandemisë.
Raporti i borxhit publik ndaj PBB-së në vitin 2020, rezultoi 77.8%, nivel që sipas Ministrisë së Financave u rrit nga tërmeti i 2019-s dhe pandemia.
Nga kreditë e marra, 50% ishte në lekë dhe ky trend u rrit me 10.5% në raport vjetor. Pjesa tjetër e mbetur në valutë, kryesohet nga euro. Monedha që shqiptarët e preferojnë edhe për ruajtjen e depozitave të tyre.
Raporti i kredive me probleme ndaj numrit të kredive gjithsej vlerësohet me 8.1%, një pjesë e madhe e të cilave i përkiste 10 kompanive më të mëdha në vendin tonë.
Volumi i pagesave përmes banking-ut nga shtëpia u rrit me 13.7% dhe vlera e transaksioneve të tyre u rrit me 8.8%. 7.03% transaksione ishin me pagesa jo cash për llogari nëpërmjet internetit. Një mënyrë e re pagesash që u përqafua gjatë pandemisë dhe vazhdon ende të jetë në nivele të larta.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
