Pafajësia e marrë me vonëse nga drejtësia greke nuk e shpëton Agim Kajmakun nga penalizimet që parashikohen nga ligji i dekriminalizimit. Shkelja e parë që ai ka bërë është se ka ofruar të dhëna të rreme dhe ka mbajtur të fshehtë faktin që është hetuar, apo gjykuar nga një autoritet i huaj për kryerjen e një vepre penale.
Në hyrje të formularit të vetëdeklarimit Agim Kajmaku pranon se në të shkuarën ka mbajtur emrin Jorgo Toto. Pikërisht me këtë emër ai rezulton i hetuar dhe gjykuar në Greqi në vitin 2003 për akuzën e falsifikimit të parave.
16 vite më vonë, Gjykata e Janinës e shfajësoi përmes një vendimi të dhënë më 12 shtator 20019 me argumentimin se nuk provohet që Agim Kajmaku është vetë falsifikatori i parave në fjalë dhe se ai vetë ka qenë viktimë e këtij falsifikimi.
Por, në formularin e vetëdeklarimit të plotësuar dhe dorëzuar në Komisionin Qendror të Zgjedhjeve më 13 maj 2019, pyetjes numër tre që thotë: “A keni qenë ndonjëherë në hetim, ose gjykim nga një autoritet i huaj për kryerjen e një vepre penale?”, Agim Kajmaku i është përgjigjur duke vendosur shenjën X tek “Jo”-ja.
Shkelja vazhdon edhe në pyetjen e katërt. “A keni qenë ndonjëherë i ndaluar, apo i arrestuar nga organet ligjzbatuese për kryerjen e një vepre penale?”, thotë kjo pyetje. Edhe këtu, Agim Kajmaku ka vendosur shenjën X tek përgjigja “Jo”.
Pyetja pesë e formularit të dekriminalizimit kërkon që kandidati për t’u zgjedhur, ose emëruar të përgjigjet nëse ka qenë caktuar ndonjëherë ndaj tij një masë shtrënguese e sigurisë personale. Edhe këtu, Agim Kajmaku përgjigjet me “Jo”.
Mbi penalizimet që burojnë nga deklarimet e rreme në formularin e dekriminalizimit Agim Kajmaku është njohur nga seksioni II i këtij formulari. Pika d) e këtij seksioni thotë se: “pasqyrimi i të dhënave të pavërteta, të paplota dhe të pasakta në këtë formular dhe refuzimi i depozitimit të gjurmëve daktiloskopike (shenjat e gishtave) passjell skualifikimin e menjëhershëm dhe në çdo kohë nga kandidimi, zgjedhja, emërimi apo ushtrimi i mëtejshëm i funksionit publik”.
Pra, sipas kësaj pike dhe mbi bazën e atyre që ka deklaruar në formularin e dekriminalizimit, Agim Kajmaku pengohet nga ligji që të vazhdojë të ushtrojë detyrën e kryetarit të Bashkisë së Vorës, pavarësisht se nga drejtësia greke ka marrë pafajësinë.
Jo vetëm kaq, por në interpretimin që Partia Demokratike i bën ligjit, thotë se Agim Kajmaku duhet të hetohet penalisht. Çfarë parashikon ligjet për këtë pjesë? Ligji i dekriminalizimit në pikën 3 të nenit 5 saktëson se “deklarimi i rrethanave të rreme, ose të shtrembëruara përbën vepër penale, sipas nenin 190 të Kodit Penal”.
Ky nen i Kodit Penal parashikon dënimet për falsifikim ose përdorim i vulave, stampave, apo formularëve të falsifikuar, ose paraqitja e rrethanave të rreme në këta formularë që dorëzohen tek organet shtetërore. Dënimi shkon nga gjashtë muaj deri në katër vjet burg.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.