Gazeta Si - Flamurtari në basketboll për femra është shpallur kampion i Shqipërisë. Faza e ‘play off’-it është mbyllur shpejt nga vlonjatet, të cilat e kanë mundur Partizanin në të tria ndeshjet e para.
Dominimi i vajzave të drejtuara nga trajnerja Elona Hasanaj ka qenë absolut. Ndeshjen e tretë, të zhvilluar në Vlorë, Flamurtari e fitoi thellë, 94-58, duke siguruar titullin para tifozerisë vlonjate.
Vlonjatet mbrojnë kështu trofeun e kampionit. I gjithë sezoni ka folur për skuadrën vlonjate, që ka bërë diferencën me kundërshtarët. Edhe Partizani, me të cilin Flamurtari u ndesh në ‘play off’, nuk pati forcën t’i përgjigjet nivelit të këtij ekipi.
Vlonjatët kanë në gjirin e tyre katër basketbolliste të huaja, të cilat e kanë ndihmuar këtë skuadër për të qenë më kompetitive.
Pas viteve 2000 është pikërisht Flamurtari që ka mbizotëruar në skenën e basketbollit të femrave në Shqipëri. Titulli i fundit është i 24-ti për vajzat vlonjate.
Trofeun e kampionit e ka dorëzuar në Vlorë presidenti i Federatës Shqiptare të Basketbollit, Avni Ponari.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.