.png)
Gazeta Si – Një 54-vjeçar është arrestuar në Mallakastër pasi u kap pranë një vatre zjarri ku dyshohet se kishte ndezur flakët, duke shkaktuar djegien e rreth 400 pemëve të ullirit.
Ngjarja u regjistrua në zonën e quajtur “Qafa e Vidhit”, ku pas njoftimit për zjarrin shkuan menjëherë shërbimet e Komisariatit të Policisë Mallakastër, në mbështetje të forcave zjarrfikëse dhe për kryerjen e veprimeve hetimore.
Gjatë ndërhyrjes, efektivët konstatuan pranë vatrës së zjarrit shtetasin Ardian Xhafo, 54 vjeç, banues në Ballsh, i cili dyshohet se kishte ndezur zjarrin që më pas u përhap në zonën përreth.
Si pasojë e flakëve u dëmtuan rreth 400 pemë ulliri, duke shkaktuar dëme materiale në pronën bujqësore.
Ai u arrestua në flagrancë për veprën penale “Shkatërrimi i pronës me zjarr”.
Materialet procedurale i janë referuar Prokurorisë së Fierit për veprime të mëtejshme. Ndërkohë, policia u ka bërë apel qytetarëve të shmangin ndezjen e zjarreve, pasi ato mund të sjellin pasoja të rënda për pronën dhe mjedisin.
Ndërkohë, një vatër zjarri është regjistruar mëngjesin e kësaj të marte në zonën e Rribanit, në Mallakastër.
Flakët kanë përfshirë një sipërfaqe pyjore, ndërsa ndërhyrja e zjarrfikësve është vështirësuar për shkak të terrenit të thyer dhe mungesës së rrugëve të aksesueshme.
Ekipet zjarrfikëse po punojnë për izolimin dhe shuarjen e zjarrit, duke përdorur edhe mjete rrethanore, pasi automjetet zjarrfikëse nuk mund të afrohen në zonën e prekur.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje