Fëmijët italianë në luftë me qeverinë kundër mbylljes së shkollave

Fëmijët italianë që protestojnë kundër vendimit për të mbyllur shkollat për të ndihmuar në kontrollin e përhapjes së koronavirusit tani kanë disa aleatë të fuqishëm, këshilltarët kryesorë të qeverisë për përballimin e pandemisë.

Ashtu si në Shqipëri, edhe në Itali shkollat u rihapën në shtator pas një mbyllje gjashtë mujore, një nga më të gjatat në Europë. Por kur vala e dytë goditi vendin fqinj në nëntor, të gjithë nxënësve të shkollës së mesme dhe shumicës së shkollave fillore iu tha që të qëndronin përsëri në shtëpi.

Mbyllja e shkollës bëri që 12-vjeçarja Anita Iacovelli nga Torino të protestonte. Në një lëvizje që është krahasuar me aktivisten adoleshente Greta Thunberg, ajo vendosi tryezën dhe laptopin e saj në rrugën jashtë shkollës dhe një tabelë ku shkruhej "Të mësuarit në shkollë është e drejta jonë". Së shpejti shokët e saj të klasës iu bashkuan në demonstrata dhe lëvizja mori emrin Shkolla për të Ardhmen, duke shkaktuar një sërë protestash në të gjithë vendin.

Agostino Miozzo, koordinatori i komitetit shkencor të qeverisë, i tha të përditshmes italiane “La Stampa se "i gjithë komiteti pajtohet që e drejta për t’u shkolluar duhet të jetë absolute në vendin fqinj". Miozzo, një kirurg, thotë nga ana tjetër se: “Nëse do të varet nga unë do të kisha rihapur shkollat ... Fëmijët kanë të drejtë të protestojnë. Do të doja të dilja në rrugë me ta. ”

Rihapja e shkollave pas valës së parë të bllokimeve dhe pushimeve verore ka qenë një dilemë për qeveritë në të gjithë Europën. Shumica kanë vendosur që t'i japin përparësi arsimit duke hapur shkolla me masa shtesë si mbajtja e maskave, klasat më të vogla dhe ajrosja shtesë. Gjatë këtij procesi, prindërit të lirë të punojnë, në vend që të kujdesen për fëmijët në shtëpi.

Gjatë fundjavës, qeveria italiane zbuti kufizimet e Covid-19 në disa rajone, duke lejuar që nxënësit e shkollës së mesme të ktheheshin në shkollë. Por, përkundër dritës jeshile nga Roma, autoritetet rajonale janë ende duke mbajtur nxënësit e shkollave së mesme në shtëpi në Umbria, Kalabria dhe Piemonte.

Vendimi ka zemëruar prindërit dhe studentët, sepse aktivitetet që përfitojnë drejtpërdrejt nga ekonomia, siç janë qendrat tregtare, tani lejohen. Një qendër e re tregtare madje u lejua të hapet në Romë, diçka që Miozzo e denoncoi si "të turpshme".

"Është shumë më e lehtë të mbyllësh një shkollë sesa të votosh hapjen e një qendre të re tregtare," shtoi ai.

Deri më tani, 11 për qind e rasteve me Covid-19 në Itali në nëntor prekën adoleshenë dhe fëmijë nën 19 vjeç. Ministrja e Arsimit Lucia Azzolina e Lëvizjes Pesë Yjet i tha se ishte "e gabuar të krijohej konflikt midis sektorit industrial dhe shkollës", duke shtuar "që të dyja janë thelbësore".

Një nga pengesat kryesore për rihapjen e shkollave është shqetësimi për transportin adekuat publik, i cili nuk është përshtatur për të lejuar udhëtimin duke ruajtur distancës shoqërore mes studentëve. Por Azzolina pretendon se transporti po funksiononte mirë në qytete të vogla ndërsa në qytetet e mëdha ishte më e vështirë për të shmangur mbipopullimin e transportit publik.

Gloria Ghetti, një mësuese historie dhe filozofie në qytetin verior të Faenza, dhe zëdhënëse e grupit të fushatës “Priorita Alle Scuole” akuzoi autoritetet se ishin dritëshkurtër dhe po përqendroheshin vetëm tek përparësia ekonomisë.

"Ata po përpiqen të ulin rastet duke i mbajtur studentët në shtëpi, por në planin afatgjatë nëse nuk investojmë tek fëmijët tanë ata do ta kenë shumë të vështirë të fitojnë kohën e humbur", tha ajo. “Mjekët kanë vërejtur një rritje të problemeve psikologjike tek fëmijët duke përfshirë ankthin, çrregullimet e gjumit dhe paaftësinë për t'u përqendruar, tha ajo, duke shtuar se fëmijët po humbin zhvillimin e personaliteteve të tyre në një kontekst shoqëror, i cili do t'i bëjë ata më pak të aftë të konkurrojnë në tregjet e punës me homologët e tyre europianë.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.