Gazeta Si – Rilindja e Elbasanit ka bërë që stadiumi ‘Elbasan Arena’ të mbushet me tifozë si në kohërat më të mira të kësaj skuadre. Aq më tepër në një ndeshje si kjo e sotmja me Flamurtarin rival, që kishte më shumë tifozë se ndeshjet e Superiores. Ndoshta mbi 7 mijë. Përballeshin dy skuadra me traditë në futbollin shqiptar, me tituj kampion të fituar.
Kjo sfidë u mbyll në barazim, 1-1, me vlonjatët shumë të pakënaqur nga gjykimi. ‘Estrada Laver Alla vazhdon’ – shkruan klubi vlonjat në faqen e tij, duke iu referuar arbitrit lushnjar, që sipas drejtuesve dhe tifozëve të Flamurtarit, vendosi ndeshjen. Pastaj edhe një postim ironim me një fragment nga filmi “Tomka dhe shokët e tij”, ku fëmijët akuzojnë hajdutët.
Janë dy episodet që lënë pas shumë diskutime. Në pjesën e parë portieri i Elbasanit kontrolloi topin në limitin e zonës, ndoshta edhe jashtë saj, shumë e vështirë për t’u kuptuar qartë. Nëse e ka kapur jashtë, është karton i kuq.
Momenti më i diskutuar është një gol i anuluar i Flamurtarit në shtesë. Goli që do t’u jepte fitoren vlonjatëve, por që VAR-i e anuloi për një faull në nisje të aksionit. Faull që në fakt, edhe nëse është, është shumë i lehtë dhe nuK justifikon anulimin e golit.
Në rrjetet sociale të gjithë gjykojnë se Flamurtari është vjedhur sot në Elbasan, ku gjykimi dukej vërtet i njëanshëm. Elbasani mban vendin e dytë aktualisht në Kategorinë e Parë, pas Bylisit, kurse Flamurtari vendin e 4-t. Direkt në elitë ngjiten 2 vendet e para, 4 vendet nga i 3-ti tek i 6-ti bëjnë play-off mes tyre dhe në fund me vendin e 8-të të Superiores.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
