.png)
Një 63-vjeçare që doli nga shtëpia e vajzës ku ishte kujdesur gjithë ditën për mbesën dhe po kthehej në banesë u sulmua nga një hajdut i cili përpara se ta grabiste, shfaqi shenja përkujdesjeje për të. Fillimisht hajduti i hodhi duart në sup dhe i merakosur e pyeti: të mbyti virusi moj nëne? Menjëherë sapo gruaja me inicialet E. Q ka kthyer kokën, i panjohuri i këputi varësen e floririt dhe u largua me vrap. Sipas burimeve të sigurta të Gazetës Si, ngjarja ndodhi pranë mbikalimit në afërsi të një qendre tregtare në autostradë. Sipas të njëjtit burim i dyshuari është L.S, 44 vjeç me precedentë të mëparshëm penalë. Ai rezulton nga këqyrjet në sistemin tims të ketë sulmuar edhe në vitin 2011 një tjetër grua duke i rrëmbyer varësen, kurse më herët ka qenë problematik për dhunë në familje. “Bashkëshorti po ecte pak metra më përpara, po ktheheshim nga shtëpia e vajzës ku mbajmë mbesën dhe po shkonim në shtëpinë tonë. Ai djali u afrua dhe më tha të mbyti virusi moj nëne. Me pas më vendosi duart në fyt dhe me dorën tjetër shkuli varësen”, rrëfen në polici e moshuara. Pasi gruaja ka bërtitur i shoqi e ka pyetur çfarë ke? Dhe në këtë rrëmujë pas hajdutit kanë vrapuar i moshuari dhe dy shtetas të tjerë, njëri prej të cilëve taksist. Kur në vendngjarje mbërriti një patrullë policie, hajduti ju lut “më lëshoni e bëra për bukën e gojës”. Por e moshuara që kishte fiksuar hajdutin që mbante veshur një bluzë të kuqe, sapo oficerët e pyetën ajo konfirmoi: Ky është. Ky ma rrëmbeu varësen.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
