.png)
E mbani mend kur aktorja amerikane, Gwyneth Paltrow u shfaq në “MTV Video Music Awards” e veshur me një kostum luksoz prej kadifeje të kuq mbi një këmishë blu të zbërthyer dhe me flokët e saj bionde të hedhur pas veshëve?
Ishte viti 1996 dhe ylli Paltrow ishte goxha në ngjitje në atë kohë. Po atë vit, 23-vjeçarja e atëhershme ishte shfaqur në “Emma”, duke luajtur protagonisten e Jane Austen (New York Times e përshkroi atë si “shkëlqyese ... duke kaluar nëpër film me një elegancë dhe zgjuarsi që të kujtonte aktoren e famshme amerikane, Katharine Hepburn”). Gjatë viteve të ardhshme, ajo do të vazhdonte të luante në filma të rëndësishëm, përfshirë “The Talented Mr. Ripley” dhe “Shakespeare in Love”. Ky i fundit i dha asaj një mori çmimesh, përfshirë Çmimin Oskar të vitit 1999 për Aktoren më të Mirë.
Dy dekada më parë, fustani rozë i lehtë që ajo veshi për të marrë Oskarin e saj tërhoqi shumë vëmendje. Por vetëm kohët e fundit kostumi i saj i kuq prej kadifeje është trajtuar me të njëjtën vëmendje.
Një kthim në hedonizëm
Ky kostum-sensual, i prekshëm, rubini i kuq -ishte nga shfaqja Gucci Vjeshtë-Dimër 1996. Stiluar nga Tom Ford, i cili iu bashkua markës italiane në 1990, u vesh për herë të parë me një shall kadifeje nga modelja amerikane, Trish Goff.
Ashtu si shumë biznese familjare që u bënë luksoze, Gucci filloi në vitet 1920 si një kompani e prodhimeve të lëkurës. Fillimisht shiste aksesorë para se të përqendrohej te bagazhet dhe, përfundimisht, çantat. Në kohën kur Ford iu bashkua, megjithatë, ishte në prag të shkatërrimit financiar.
Fillimisht i pyetur për t’u kujdesur për veshjet e gatshme të grave, Ford u bë drejtor kreativ në 1994 pas largimit të Mello. Me kontrollin e plotë të markës, ai krijoi një pamje të re për femrat: atë që ishte e zjarrtë dhe provokuese pa turp.
Ford, i cili ishte trajnuar si arkitekt, do të mbante punën kryesore në Gucci deri në vitin 2004. Ai mori shumë nga frymëzimi i tij hedonistik nga bota e ‘Studio 54’ e epokës Halston, duke i vendosur modelet e tij në mëndafsh dhe bluza kadifeje. Ai tregoi qartë potencialin erotik të veshjeve - diçka që ai vazhdoi ta shtynte në një seri fushatash të tjera.
Për botën e modës, qëndrimi i tij ishte një ajër i pastër.
“Më shumë se çdo stilist tjetër, Tom Ford do të hyjë në histori si njeriu përgjegjës për veshjen e viteve të fundit të shekullit të 20-të”, do të shprehej kritikja britanike, Susannah Frankel në gazetën “Independent” në 1999. “Me një super magji sensuale, emërtimi Gucci ka arritur të nënkuptojë se është ushqim i përsosur i fundit të mijëvjeçarit”.
Rikthimi i sensualitetit
Me modën e epokës në mes të një ringjalljeje, mediat sociale tani po rishikojnë pamjen e disa prej standardeve më joshëse - nga një Julia Roberts e stilizuar shkëlqyeshëm deri te Liz Hurley me atë fustanin Versace.
Ka ardhur një moment ku llogaritë në Instagram si @tomfordforgucci kanë lulëzuar. Duke u futur në historinë vizuale të qëndrimeve të Fordit në Gucci dhe Yves Saint Laurent, të cilin ai e drejtoi nga 1999 në 2004, llogaria e kthimit ka prezantuar editorialet e tij të modës dhe pamjet e pasarelave tek një auditor i ri i uritur për sensualitet të guximshëm.
Paltroë është një nga yjet që rikthehet dhe paraqitjet në tapetin e kuq të viteve '90 tani përmbytin mediat sociale. Dhe si rezultat, kostumi i saj i kuq, tani është një artikull gjithnjë e më i lakmueshëm me një vlerë prej më shumë se 8,000 dollarë.
Për të festuar 100-vjetorin e Gucci në prill, drejtori aktual, Alessandro Michele, madje dërgoi një kopje pothuajse të përsosur të kostumit të kuq, megjithëse ai zëvendësoi shallin kadife origjinal me një zinxhir prej argjendi.
Është joshëse të përpiqesh të diagnostikosh arsyet e interesit të ringjallur në modën e epokës - dhe gratë që i veshën ato.
Ndoshta ajo mishëron atë që ne tani e shohim si një kohë pafajësie- një dekadë para 11 Shtatorit, kryesisht para internetit që duket e largët nga e jona, por mjaft e afërt që të mos ketë rrëshqitur tërësisht në sferat e historisë.
Ose ndoshta ne jemi të pushtuar nga një ndjenjë bezdisëse që dizajni ishte më emocionues ose më i guximshëm në të kaluarën, veçanërisht në vazhdën e një pandemie që ka ndërhyrë në të kuptuarit tonë si për kohën, ashtu edhe për stilin.
Por pavarësisht nga arsyet, kostumi i Paltrow demonstron se çdo gjë në modë mund të ringjallet dhe të kthehet në qendër të vëmendjes. Në fund të fundit, ishte Ford ai që kishte plaçkitur vitet ‘70 për të krijuar diçka të freskët për vitet ‘90 në radhë të parë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
