.png)
Nga Gazeta ‘Si’- Të paktën 492 njerëz janë vrarë në sulmet ajrore intensive dhe të gjera izraelite që synonin Hezbollahun në Liban. Shifra u bë e ditur nga Ministria e Shëndetësisë e vendit, në ditën më vdekjeprurëse të konfliktit atje në pothuajse 20 vjet.
Sipas Ministrisë së Shëndetësisë së Libanit, 35 fëmijë dhe 58 gra ishin në mesin e viktimave, ndërsa 1,645 të tjerë ishin plagosur.
Mijëra familje janë larguar gjithashtu nga shtëpitë e tyre pasi ushtria izraelite tha se goditi 1300 objektiva të Hezbollahut, në një operacion për të shkatërruar infrastrukturën që grupi i armatosur kishte ndërtuar që nga lufta e vitit 2006.
Sipas ushtrisë, Hezbollahu, ndërkohë, lëshoi më shumë se 200 raketa në veri të Izraelit. Mjekët thanë se dy persona u plagosën nga predha.
Fuqitë botërore kanë kërkuar vetëpërmbajtje pasi të dyja palët duket se po afrohen më shumë drejt një lufte gjithëpërfshirëse.
Sekretari i Përgjithshëm i OKB-së, António Guterres shprehu alarmin për situatën në përshkallëzim dhe tha se ai nuk dëshiron që Libani "të bëhet një Gazë tjetër". Përpara mbledhjes së liderëve botërorë në OKB në Nju Jork, shefi i çështjeve të jashtme të BE-së Josep Borrell tha se "përshkallëzimi është jashtëzakonisht i rrezikshëm dhe shqetësues, ne jemi pothuajse në një luftë të plotë".
Edhe presidenti Joe Biden tha se SHBA "po punonte për të de-përshkallëzuar në një mënyrë që lejon njerëzit të kthehen në shtëpi të sigurt", ndërsa Pentagoni njoftoi se po dërgonte "një numër të vogël" trupash shtesë në Lindjen e Mesme.
Gati një vit luftimesh ndërkufitare midis Izraelit dhe Hezbollahut, të shkaktuara nga lufta në Gaza, janë vrarë qindra njerëz, shumica prej tyre luftëtarë të Hezbollahut, dhe janë zhvendosur dhjetëra mijëra në të dy anët e kufirit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
