Gazeta Si - Gjykata e Korçës ka liruar nga qelia 4 të rinjtë e arrestuar për dhunimin me shkopinj të 30-vjeçarit Ramadan Hasani, ngjarje e ndodhur javën e kaluar në një servis makinash.
Në seancën e zhvilluar sot, Gjykata e Korçës e konsideroi të paligjshëm arrestimin e tyre dhe vendosi t’i lërë të lirë me masën detyrim për t’u paraqitur.
“Në Gjykatën e Shkallës së Parë e Juridiksionit të Përgjitshëm Korçë, u zhvillua sot në datën 28.03.2024 ora 09.30 seanca me objekt “Vleftësim ndalimi, caktim masë sigurimi” ndaj shtetasve E.G, K.S, M.XH, S.S ku Gjykata vendosi: mos vleftësimin e ligjshëm të ndalimit dhe caktimin e masës se sigurimit ” detyrim për t’u paraqitur ne Policinë Gjyqësore” për këta shtetas”, thuhet në njoftimin e gjykatës.
Katër persona dhunuan me shkopinj dhe sende të forta 30-vjeçarin pas një sherri për motive banale mes tyre. Ngjarja ishte filmuar nga kamerat e sigurisë së servisit ku ndodhi konflikti.
Disa ditë pas sherrit, autorët u vetëdorëzuan në polici pasi ishin shpallur në kërkim, ndërsa sot u liruan nga gjykata.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.