Federata shqiptare e Basketbollit nuk e ka shpallur ende vendimin zyrtar, por Bruno Daliu e ka mbyllur me basketbollin. Komisioni i Disiplinës ka vendosur që basketbollisti i Tiranës të përjashtohet përjetësisht nga ky sport, ndërkohë që për të do të ketë edhe një gjobë financiare, mbetet për t’u parë shifra që do të vendosë FSHB-ja.
Bruno Daliu dhunoi me grushte dhe shkelma arbitrin Jurgen Muho gjatë ndeshjes Teuta-Tirana, e zhvilluar të shtunën në mbrëmje në Durrës. Ai u arrestua disa minuta më pas nga Policia e Durrësit dhe rrezikon të vuajë deri në 5 vjet heqje lirie, sipas ligjit të ri, ndërsa Federata, pasi dënoi aktin e shëmtuar me një komunikatë zyrtare, sot ka vendosur ta dënojë përjetësisht Daliun.
Ishte një dënim i pritshëm për këtë basketbollist, që më parë ka qenë edhe pjesë e Kombëtares. Pamjet e sulmit të dhunshëm të tij ndaj arbitrit Muho u përhapën me shpejtësi dhe të gjithë kanë dënuar veprimin skandaloz të basketbollistit 34-vjeçar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.