.png)
Gazeta Si - Hekuran Marku, ish-truproja i ish-ministrit të Brendshëm Sajmir Tahiri, është dënuar me 8 vite e 8 muaj burg për trafik ndërkombëtar droge.
Prokuroria kërkoi 12 vite heqje lirie për Markun, ndërsa Gjykata rriti me një vit dënimin, në 13, por ai përfitoi zbritje të dënimit me 1/3 për shkak të gjykimit të shkurtuar, duke u dënuar përfundimisht me 8 vite e 8 muaj.
Ai akuzohet për trafik narkotikësh në kuadër të grupit të strukturuar kriminal. Ndaj Markut nisën hetimet si pjesë e një grupi kriminal, bashkë me ish-truprojën tjetër të Tahirit, Agustin Dedën, për të cilin ende zvarriten procedurat e ekstradimit.
Ky i fundit ndodhet në Francë, pasi ka kërkuar azil politik dhe autoritetet atje janë duke shqyrtuar kërkesën e tij.
Më 1 prill, Marku u ekstradua nga Gjermania, për t’u përballur me GJKKO me akuzat e ngritura nga SPAK.
Marku e Deda akuzohen se janë përfshirë në trafikun e drogës të zbuluar në kuadër të hetimeve nga operacioni i koduar "Shpirti".
Ata akuzohen si të përfshirë në ‘skemën’ e trafikut ndërkombëtar të kanabisit të drejtuar nga Ilirjan Duçellari.
Sipas SPAK, 2 truprojat kanë bashkëpunuar edhe me 4 italianë dhe një shqiptar për të trafikuar rreth 1 ton kanabis drejt Italisë.
Kjo sasi droge u sekuestrua më pas në Bari ku u vendosën në pranga 2 persona. Në dosje thuhet se Marku dhe Deda kishin kultivuar drogën në disa parcela në Tepelenë dhe ishin kujdesur për transportin e tyre.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
