Curaçao, lojtarët ndajnë dhomat me partneret e tyre (me lejen e doktoreshës)

Gazeta Si – Me një popullsi prej pak më shumë se 150,000 banorësh, tashmë mban rekordin për të qenë kombi më i vogël që ka arritur të kualifikohet ndonjëherë për Kupën e Botës, por Curaçao ka vendosur gjithashtu të thyejë një nga tabutë më të rrënjosura në historinë e futbollit, duke u lejuar lojtarëve të ndajnë dhomat me mikeshat, partneret apo gratë e tyre në kampin stërvitor.

Sikur të mos mjaftonte kjo, mjekja e ekipit kombëtar, Suzanne Huurman, madje i ka inkurajuar lojtarët të kenë marrëdhënie seksuale.

“Mendoj se seksi ndihmon, por ndoshta më shumë në një nivel emocional, sesa për një efekt të drejtpërdrejtë fiziologjik”, shpjegoi mjekja, gruaja e tretë në historinë e turneut që mban këtë rol, në një intervistë me “Globoesporte”, duke pranuar, megjithatë, se është një vendim mjaft i pazakontë.

“Është diçka mjaft unike në skenën kombëtare të futbollit”, pranoi Suzanne. “Curaçao është një vend i vogël, me një popullsi shumë të gëzuar, të ngrohtë dhe të orientuar drejt familjes, gjë që më kujton shumë Brazilin. Lojtarët mund të ndajnë një dhomë me partneren e tyre, dhe kur ka fëmijë, familja ka një dhomë shtesë”.

Shkurt, në selinë e Boca Raton, Florida, shëndeti mendor dhe mirëqenia e lojtarëve vijnë në radhë të parë. “Gjatë një turneu kaq të gjatë, të kesh familjen pranë, e zvogëlon pak mallin për shtëpinë dhe sjell qetësi shpirtërore”, u pajtua doktoresha, duke zbuluar se vetë federata pagoi për udhëtimin e anëtarëve të familjes.

“Shumë nga lojtarët tanë nuk luajnë në nivelet më të larta të futbollit botëror dhe për shumë familje, udhëtimi dhe qëndrimi në Shtetet e Bashkuara për javë të tëra me shpenzimet e tyre do të ishte shumë i kushtueshëm”, shpjegoi ajo, “kështu që federata vendosi ta mbulonte këtë kosto në mënyrë që lojtarët të mund të kenë partneret dhe fëmijët e tyre afër”.

Të trajnuar nga ish-trajneri i Sunderlandit, holandezi Dick Advocaat, Curaçao u shkatërrua 7-1 nga Gjermania në ndeshjen e tyre të parë në Kupën e Botës, por të shtunën e kaluar, ata barazuan 0-0 kundër Ekuadorit, duke marrë kështu një pikë të papritur që i lejon të shpresojnë për një kualifikim të mundshëm (dhe historik) për raundin e 1/16 si skuadra më e mirë e vendit të tretë, me kusht që të mposhtin Bregun e Fildishtë (aktualisht i dyti në grup me tre pikë) në Filadelfia të enjten (nesër, 25 qershor).