Me shtimin e infektimeve të reja me Covid 19 në vend për shkak të variantit Delta, është rritur edhe numri i personave të pranishëm që kanë familjarë të shtruar në Spitalin Infektiv.
Këtë të mërkurë, prania e tyre pranë kangjellave të Covid 1 ka rënë në sy, për shkak se mbanin në dorë qese me ushqime dhe ndërresa për familjarët e tyre.
Skena të tilla janë parë në shkurtin e shkuar, kur ka pasur edhe një mbingarkesë në spitalet Covid në Shqipëri. Një fenomen i tillë u kthye në shqetësim për opinionin publik, duke ngritur dyshime për funksionimin e plotë të kapaciteteve spitalore.
Por ministrja e Shëndetësisë, Ogerta Manastirliu, u justifikua se dërgimi i ushqimeve nga familjarët për pacientët me COVID, është bërë jo sepse spitalet nuk kanë kapacitete dhe mungesa ushqimore, por si një mundësi komunikimi me të afërmit e tyre.
Manasrtirliu argumentoi se bëhet fjalë për një vendimmarrje të strukturave të spitaleve për të lejuar një komunikim me familjarët edhe për ushqimin apo ndërresat.
Për momentin, vetëm Spitali Infektiv në QSUT pret pacientë të shtruar me koronavirus. Sipas autoriteteve shëndetësore, pritet që brenda pak ditësh, duke parë dhe fluksin e shtuar të të infektuarve, të rihapet spitali Covid 3 që ndodhet në godinat e QSUT-së.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
