Covid-19 u përhap më shumë nga të infektuarit asimptomatikë

08:57 - 13 Maj 2020

Sipas një studimi të fundit më shumë se gjysma e njerëzve të infektuar e kanë marrë virusin Covid-19 nga persona asimptomatike. Ekspertët e shëndetit në Irlandë kanë rishikuar 17 studime në të gjithë botën për të vlerësuar se si ndodh transmetimi i virusit në periudhën që një i infektuar nuk shfaq simptoma. Siç dihet duhen mesatarisht gjatë deri në 14 ditë që të prekurit të zhvillojnë shenjat e Covid-19 dhe ditët e para ata mund të përojë virusin tek të tjerët. Sipas ekspertëve kontrolli i përhapjes se Covid-19 është thelbësor, tashmë që masat e izolimit do të lehtësohen. Deri më tani virusi i ka marrë jetën 286.538 njerëzve në të gjithë botën, që nga fillimi i përhapjes në dhjetor. Shkencëtarët po përpiqen të kuptojnë se si virusi përhapet midis njerëzve, gjë që do t’i ndihmojë ata në krijimin e një medikamenti ose vaksine.

Autori kryesor i studimit Miriam Casey, nga Kolegji universitar në Dublin tregoi se studimet e përdorura ishin përgjatë periudhës së inkubacionit, kohën mes ekspozimit të virusit dhe shfaqjes së simptomave të para. Ekipi i Dublinit tha se transmetimi nga njeriu tek njeriu duket se ndodh në periudhën tre ditë para se të fillojnë simptomat dhe dy ditë më pas. Studiuesit përdorën këtë informacion dhe një ekuacion matematikor për të krijuar një vlerësim se sa raste janë rezultat i përhapjes presimptomatike. Në një studim që përfshinte 137 njerëz në Tianjin, një komunë në Kinë, përhapja presimptomatike u vlerësua rreth 80.7 për qind të të gjitha rasteve. Ekipi shkroi se këto gjetje nxjerrin në pah nevojën urgjente për zbulimin jashtëzakonisht të shpejtë, të të prekurve dhe gjurmimin e kontaktit dhe sqarojnë faktin nëse masat duhet të lehtësohen apo jo. Gjurmimi i kontaktit është propozuar si një mënyrë për të kufizuar përhapjen e koronavirusit. Kjo përfshin identifikimin e kujtdo që ka qenë në afërsi të dikujt përpara se të diagnostikohej me COVID-19. Burimi Daily Mail, Përshtati në Shqip Gazeta Si

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.