.png)
Çmimet europiane të gazit natyror ndaluan rritjen rekord, pasi flukset që vijnë nga Rusia në kontinent u rritën dhe sanksionet e SHBA-së që synonin Moskën hoqën dorë nga sektori i energjisë.
Të enjten(24 shkurt), çmimet u rritën deri në 62%, më së shumti që nga viti 2005, mes pasigurisë se si pushtimi rus i Ukrainës do të ndikonte në dërgesa.
Konflikti – kriza më e keqe e sigurisë në Europë që nga fundi i Luftës së Dytë Botërore – ka nxjerrë në pah krizën e furnizimit me energji të kontinentit, e cila ka nisur prej muajsh për shkak të stoqeve të ulëta të gazit. Rusia është furnizuesi më i madh i gazit në Europë, duke siguruar më shumë se një të tretën e nevojave të rajonit. Rreth një e treta e këtyre dërgesave kalojnë tranzit përmes Ukrainës.
Gazprom ka përsëritur se tranziti i gazit përmes Ukrainës po funksionon normalisht dhe tranziti po rritet në përputhje me kërkesat e klientëve. Ndërsa flukset ruse përmes Ukrainës janë rikuperuar për t’iu afruar niveleve të dakorduara në kontratat e tranzitit, një tubacion kyç në Gjermani nëpërmjet Polonisë nuk po dërgon asnjë gaz në Europë.
Sanksionet e fundit
Ministri i Jashtëm i Ukrainës tha më herët se Kievi u godit me raketa “të tmerrshme” ndërsa trupat ruse po i afroheshin kryeqytetit. SHBA dhe Britania e Madhe shpalosën një raund të ri ndëshkimesh që synojnë të gjymtojnë ekonomikisht Rusinë.
Bashkimi Europian gjithashtu mbështeti një paketë të gjerë sanksionesh për të kufizuar aksesin e Rusisë në sektorin financiar të Europës dhe për të kufizuar teknologjitë kryesore.
Megjithatë, administrata Biden mbrojti vendimin e saj për të mos sanksionuar sektorin energjetik të Rusisë, me një zyrtar që tha se nuk dëshironte të prishte një zonë “ku Rusia ka rëndësi sistemike në ekonominë globale”.
“Ne nuk do të bëjmë asgjë që shkakton një ndërprerje të paqëllimshme të rrjedhës së energjisë pasi një rimëkëmbje ekonomike globale është ende në zhvillim e sipër”, tha zëvendës këshilltari i Sigurisë Kombëtare Daleep Singh para gazetarëve në Shtëpinë e Bardhë.
Eksportet e gazit rus përmes Ukrainës u rritën pothuajse 38% të enjten dhe pritet të rriten me rreth 24% të premten, sipas të dhënave nga operatori i rrjetit të Ukrainës
“Ne besojmë se rreziku i reduktimit të furnizimeve të gazit rus nën angazhimin e saj kontraktual është i kufizuar nëse nuk ka një përshkallëzim të mëtejshëm material të krizës,” thanë në një raport analistët e JPMorgan Chased & Co,Vincent Ayral dhe Javier Garrido.
Burimi: Bloomberg/ Përshtati: Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
