Interviste

Bushati: Shqipëria i dha një mesazh solidariteti Europës!

Bllokimi i më shume se 140 refugjatëve në brigjet italiane duket se ka qenë pika e fundit që ka “zbrazur gotën e konfliktit” mes qeverisë së re italiane dhe Bashkimit Europian. Edhe pse ky ishte një ngërç që ishte parashikuar prej kohësh nga ekspertët, askush nuk e priste ndërhyrjen e një vendi të vogël si Shqipëria. Vendimi i ministrit të Jashtëm, Ditmir Bushati, për të strehuar një pjesë të refugjatëve është pritur më mjaft habi nga mediat ndërkombëtare. Fati i 140 emigrantëve, shumica prej të cilëve janë nga Eritrea, ka shkaktuar protesta masive përgjatë gjithë javës, ndërkohë që ministri i Brendshëm italian, Matteo Salvini refuzoi ankorimin e anijes, derisa BE të pranonte shpërndarjen e emigrantëve midis vendeve të tjera. E mesa duket, në këtë situatë, qeveria shqiptare e pa të arsyeshme të tregonte të njëjtin solidaritet që fqinjët treguan ndaj shqiptarëve gati 20 vite më parë, kur që po i arratiseshin diktaturës. Në një intervistë për BBC në emisionin “Newshour” Ministri Bushati sqaron se “Shqipëria për asnjë moment nuk e sheh krizën e refugjatëve si mënyrë për të përparuar me procesin e integrimit në BE.  Bushati sqaron se kemi të bëjmë me jetë njerëzish, qofshin këto eritreas apo europianë. Sipas tij qeveria shqiptare kërkon të dërgojë një mesazh solidariteti, në një kohë kur Europa është më e përçarë se kurrë.

Refugjatët e bllokuar në brigjet italiane

“Newshour”-Pse pranoi Shqipëria të marrë disa nga emigrantët nga Eritrea?  Nuk është anëtare e BE-së, por aspiron të bëhet e tillë.

Ditmir Bushati- Është një vendim që e kemi bërë tashmë publik, pas diskutimeve të gjata me autoritetet italiane, të cilat na kërkuan mbështetje në këto përpjekje. Gjithashtu, përputhet me qëndrimin e Shqipërisë katër vite më parë, kur nisi kriza e refugjatëve, sipas të cilit të gjitha vendet e Europës, pavarësisht nëse janë pjesë e BE-së apo jo, duhet të kontribuojnë disi në tejkalimin e krizës, sepse kriza e emigrimit është një krizë Europiane, ndaj kërkon përgjigje Europiane.

“Newshour” -Kuptova gjithashtu se kjo që po ndodh sot ju kujton atë që ka ndodhur me shqiptarët më shumë se 20 vite më parë.

Ditmir Bushati -Është e vërtetë. Kur regjimi komunist ishte duke rënë, shumë shqiptarë u larguan nga vendi, për shkak të arsyeve politike, por kryesisht ekonomike. Nuk duhet ta harrojmë historinë tonë të 2-3 dekadave më parë. Ky ishte një tjetër faktor motivues.

Dhe kjo histori përfshinte Italinë që pranoi shqiptarët që donin të largoheshin nga vendi.

Po, Italia po na shpëtonte. Shumë shqiptarë u pranuan prej saj gjatë atyre kohëve dramatike. Tani është radha jonë që të kontribuojmë në këtë proces. E di shumë mirë, sepse ka pasur njerëz që na kanë kritikuar. Na kanë thënë që refugjatët që po ndihmojmë nuk janë nga Italia, por nga Eritrea. Por këtu po flasim për njerëz, në radhë të parë. Ndonjëherë harrojmë që janë qenie njerëzore, dhe së dyti, kjo është një krizë masive. Asnjë vend europian nuk e përballon dot vetëm.

Ministri i Jashtëm, Ditmir Bushati

“Newshour” -A po i dërgoni kështu një mesazh edhe disa vendeve të Europës së Veriut, të cilat kanë qenë më pak mikpritëse?

Ditmir Bushati -Fatkeqësisht, e kemi parë Europën të përçarë. Kemi parë vende jo vetëm në veri të Europës, por edhe në lindje, të cilat e kanë harruar historinë e tyre. Unë mund të kujtoj çastet e rënies së Murit të Berlinit, por edhe gjatë komunizmit ka pasur shumë njerëz nga ana lindore që i largoheshin komunizmit dhe shkonin në perëndim. Mendoj se është një mesazh edhe për BE-në, që na duhet një pikëpamje më koherente, një përgjigje më koherente për çështje kaq të rëndësishme. Edhe nga perspektiva e vendeve kandidate, siç është Shqipëria.

“Newshour”-Shpresoni që kjo t’i bëjë vendet e BE-së ta shohin kandidaturën tuaj me sy më pozitiv?

Ditmir Bushati - Nuk e shohim krizën e refugjatëve si mënyrë për të përparuar me procesin e integrimit në BE. Procesi ynë bazohet në rregulla dhe parime të tjera. Sigurisht që do të donim ta shihnim BE-në më të angazhuar me çështjet e Ballkanit Perëndimor, përfshirë vendin tim. Kemi dëgjuar në të shkuarën debate për ndërtimin e kampeve të refugjatëve jashtë BE-së. Kjo do të ishte e papranueshme, sepse ne e shohim këtë si një përpjekje të përbashkët me vende të tjera të BE-së.

Refugjatët e bllokuar në brigjet italiane

Copyright © Gazeta “Si”


Më Shumë