Gazeta Si – Presidenti i El Salvadorit, Nayib Bukele, prezantoi “burgun më të madh në Amerikë”, ku do të mbahen 40,000 anëtarë “pandillas”, anëtarë të dyshuar të bandave të dhunshme kriminale që vranë 87 njerëz në vetëm tre ditë marsin e kaluar.
Mega-burgu u ndërtua në një zonë të izoluar rurale në një luginë pranë Tecoluca, 74 kilometra në juglindje të kryeqytetit San Salvador.
Ndërtesa, e quajtur “Qendra për Kufizimin e Terrorizmit”, përbëhet nga një duzinë pavijonesh që zënë 23 hektarë, shpjegoi ministri i Punëve Publike, Romeo Rodríguez.
Burgu ka një mur rrethues 2.1 km, i cili do të monitorohet ditë e natë nga 600 ushtarë dhe 250 policë.
Bukele (në foto, me xhinse, duke vizituar burgun), tha se qeveritë e mëparshme salvadoriane “i lejuan anëtarët e bandave të qëndronin në burg me prostituta, PlayStations, TV, celularë, kompjuterë… duke shpërblyer shkelësit”.
Presidenti nuk specifikoi se kur do të transferohet në mega-burg i pari nga rreth 63,000 anëtarët e dyshuar të bandës të arrestuar si pjesë e luftës kundër “pandillave”.
Regjimi i emergjencës i miratuar vitin e kaluar, lejon arrestime masive pa asnjë urdhër gjyqësor.
Organizatat e të drejtave të njeriut, kanë denoncuar prej kohësh abuzimet e përsëritura nga autoritetet dhe situatën gjithnjë e më kritike në burgjet e vendit, të cilat deri më tani mund të strehojnë zyrtarisht vetëm 20,000 të burgosur.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
