.png)
Gazeta Si - Gjykata ka lënë në burg Aldo Brahimin dhe Ylli Grabovarin, autorët e dyshuar të vrasjes me thikë të 32-vjeçares Luljeta Preza.
Në dëshminë e tyre të parë, dy autorët e kanë mohuar vrasjen, ndërsa përpara gjykatës kanë dalë kokulur. Brahimaj dhe Grabovari janë shprehur se nuk mbajnë mend se çfarë ka ndodhur.
E pranishme në sallë ka qenë edhe nëna e 22-vjeçarit Brahimaj, e cila pranon dënimin e të birit. “Të kalbet brenda nëse e ka bërë djali im”., - tha ajo në gjykatë.
Familjarë të Aldo Brahimit, kanë mbërritur nga Grabjani i Lushnjës në Gjykatën e Durrësit për të ndjekur seancën për caktimin e masës së sigurisë në gjykatë.
Nëna dhe njerku i 22-vjeçarit deklaruan se kishte disa javë që Brahimi ishte larguar nga shtëpia për të mbledhur kanaçe.
E ëma u shpreh se nuk kishte dijeni se me çfarë merrej i biri ndërkohë që nuk kthehej në shtëpi, deri kur në derë i është shfaqur policia.
Luljeta Preza nga Sukthi, pjesë e komunitetit rom u gjet e pajetë poshtë Urës së Dajlanit para pesë ditësh.
Sipas policisë, pasi e vranë, ata e lanë trupin e pajetë të vajzës nga Sukthi poshtë "Urës së Dajlanit" në Durrës.
Policia njoftoi se në momentin e krimit autorët e dyshuar dhe viktima kanë qenë nën efektin e kokainës. Bashkë me ta kanë qenë edhe 3 shtetase të tjera, që janë proceduar penalisht.
Gjatë konfliktit 2 autorët kanë goditur me thikë Luljeta Prezën, e cila si pasojë ka humbur jetën në vendin ku iu gjet trupi.
Dyshohet se viktima kishte konsumuar kokainë, së bashku me tri vajzat e identifikuara si B. S. 28 vjeçe, M. M. 26-vjeçe dhe një e mitur 15 vjeç. Sipas burimeve policore, viktima është abuzuar seksualisht dhe më pas është goditur me thikë në pjesë të ndryshme të trupit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
