Vitet e fundit, Bibliotekës Kombëtare nuk i janë ndarë as fatkeqësitë. Më 2017, një zjarr i shkaktuar nga rrjeti elektrik dogji afro 3 mijë kopje librash, një vit më vonë ata u përmbytën nga reshjet e shiut duke dëmtuar 12 mijë njësi bibliotekare, ndërsa pamjet e trishtueshme të punonjëseve që rrekeshin me ç’të mundnin të shpëtonin ndonjë syresh, duke e nderë apo tharë me tharëse flokësh, mbushën rrjetin dy vjet më parë dhe nga sot, ajo do të jetë e mbyllur për një periudhë të pacaktuar për shkak të dëmtimeve që pësoi nga protestat në kryeqytet për vrasjen e Klodian Rashës, nga një efektiv policie.
Me gjithë investimet që thuhet të kenë kapur vlerën e 27 milionë lekëve në 7 vitet e fundit dhe u premtua rikonstruksion, marsi i këtij vitit dha shpresën për një godinë të re.
Tirana është i vetmi qytet pa bibliotekë. Ajo bibliotekë kombëtare është përmbytur prej 20 vjetësh, jo nga uji, por nga vetvetja. Libri nuk do lagej nëse s’do kishte mbingarkesë me libra. Aty nuk ka më korridor, por ka libra përtokë , do të shprehej dy vjet më parë Aurel Plasari, ish-drejtor i Bibliotekës Kombëtare.
Një katedrale 100 vjeçare të librave, e cilësonte ministrja e Kulturës, Elva Margariti Bibliotekën Kombëtare, në ekspozitën “Verba Volant, Scripta Manent”, të çelur për të kremtuar njëqind vitet e jetës së saj, në hollin e Kryeministrisë...
E themeluar më 1920, tanimë as godina e vjetër në Rrugën “George Bush” përballë Parlamentit e as e reja, në Pallatin e Kulturës nuk e kanë më kapacitetin për të strehuar tituj të rinj. Nevojën për një godinë të re e artikuloi ish-drejtoresha Persida Allsani, ndërsa drejtori i ri Piro Misha e sheh depresive godinën në hyrje, me një portë duralumini që nga koha e regjimit komunist.
Lajmi i mirë u duk se erdhi gjatë marsit, kur Bashkia Tiranë çeli konkursin për ndërtime me fokus kulturën dhe argëtimin pranë Gardës, në krah të Liqenit. Agjencia e Prokurimeve Publike publikoi një tender të Bashkisë Tiranë, gjatë pandemisë.
Synimi i tenderit ishte ndërtimi i një kompleksi godinash të integruara në zonën e Gardës së Republikës, ku do të vendosen Biblioteka Kombëtare dhe Qendra Kombëtare e Kulturës për Fëmijë.
Gjatë çeljes së ekspozitës “Verba Volant, Scripta Manent”, me botime antike të Bibliotekës Shqiptare të ekspozuara për herë të parë për publikun, kryeministri Rama theksoi se me gjithë dëshirën për të festuar në godinën e re të Bibliotekës, projekti u detyrua të ndalej nga tërmeti dhe vazhdon të jetë edhe sot për shkak të mbivendosjes së dëmeve nga tërmeti dhe situatës së rëndë financiare që erdhi si pasojë e pandemisë.
Dëmtimet e fundit që ka pësuar Biblioteka Kombëtare përfshijnë hyrjen kryesore, si edhe 21 xhama të dritareve.
Biblioteka Kombëtare e Shqipërisë njofton se është ngritur Grupi i Emergjencës për të marrë masat e menjëhershme për riparimin e dëmeve të shkaktuara si dhe rikthimin në normalitet.
Me 1 milionë e 300 mijë libra pjesë e fondit të Bibliotekës Kombëtare, kryeministri Rama theksonte rëndësinë e dixhitalizimit të tyre.
“Gëzuar një shekull jetë e gëzofsh edhe shumë të tjerë pas nesh, në një tjetër tempull, ku të ruhen veprat e saj të pakohshme!”, shprehej Margariti në 100 vjetorin e Bibliotekës, që edhe njëherë përtej masave të mbylljes gjatë pranverës së karantinës, i duhet të mbyllet edhe njëherë duke treguar se koha ka ardhur që ajo të lëvizë prej qendrës dhe po ashtu tregon nevojën për një bibliotekë qyteti, ku Tirana duket nga të vetmit qytete që nuk e ka një të tillë..
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.