.png)
Nga Gazeta ‘Si’- Kreu demokrat Sali Berisha deklaroi se do të jenë forumet e PD-së ata që do vendosin nëse do të hyjnë apo jo në parlament.
Në konferencë për shtyp, lideri demokrat u shpreh se edhe nëse marrin pjesë në parlament, do të votojnë vetëm ligjet që lidhen me procesin e integrimit të Shqipërisë në Bashkimin Europian.
“Të gjitha do vendosen nga forumet. Por unë, në presupozimin e pjesëmarrjes në parlament, deklarova që ne do votojmë vetëm ato ligje që kanë të bëjnë me integrimin e Shqipërisë në BE. Ky ka qenë. Unë nuk thashë a do marrim apo nuk do marrim. Unë thashë se në qoftë se do marrim, por unë thashë se në rast se marrim, ne do votojmë vetëm këto. Se atë nuk e vendos unë, atë e vendosin forumet. Do ketë diskutime. Por këto janë farsë elektorale, e damkosur ndërkombëtarisht si e tillë para se të zhvillohet. E faktuar totalisht nga vëzhguesit ndërkombëtarë në raportin e tyre paraprak. Pra, ky është realiteti sot”.
Berisha ripërsëriti edhe njëherë kërkesën e tij për qeveri teknike me një agjendë të qartë, që do të përqendrohet në zgjidhjen e çështjeve të integrimit dhe organizimin e zgjedhjeve të lira dhe të ndershme.
“Normalisht vetëm zgjedhje të parakohshme. Pa diskutim. Qeveri teknike, me një agjendë të përcaktuar, problemet që zgjidhen direkt me integrimin dhe zgjedhjet e lira dhe të ndershme. Kjo është kërkesa jonë, për të cilën do luftojmë me të gjithë mbështetësit tanë dhe miqtë tanë në Europë dhe në botë”, theksoi Berisha.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
