.png)
Nga Gazeta ‘Si’- Kreu demokrat Sali Berisha ka hedhur akuza lidhur me procesin e votimit të diasporës për zgjedhjet e 11 majit, duke e cilësuar atë si ‘faqja më e turpshme e farsës elektorale’.
Berisha pretendon se vota e diasporës është manipuluar sipas tij në mënyrë masive dhe të koordinuar nga qeveria dhe Partia Socialiste.
Sipas Berishës, kompania ndërkombëtare DHL, e cila ishte kontraktuar për transportin e zarfeve, ka shkelur kontratën duke përdorur nënkontraktorë të lidhur ngushtë me PS-në, pavarësisht se kontrata ndalonte qartësisht çdo nënkontraktim. Sipas tij segmenti shqiptar i DHL-së ka vepruar sipas urdhrave të Edi Ramës.
“DHL me urdhër të qeverisë ka shkelur kontratën dhe ka kontraktuar nënkontraktorë të tjerë, të cilët kanë bashkëpunuar ngushtë me PS-në. Ndonëse kontrata parashikonte se asnjë lloj nënkontraktimi nuk mund të bëhej. DHL u pranua nga ne për shkak të reputacionit të saj, por segmenti shqiptar i DHL-së funksionoi krejtësisht sipas urdhrave, porosive të qeverisë dhe të Edi Ramës. Zarfet, votat, nuk u mbushën nga qytetarët e regjistruar, por ato në mijëra, mijëra, mijëra prej tyre u plotësuan nga patronazhistët, të dërguar nga Tirana, nga punonjës apo ish-punonjës të ambasadave dhe solli një manipulim të dalë jashtë kontrolli”, tha Berisha.
Berisha akuzoi gjithashtu Postën Shqiptare për përfshirje direkte në manipulim, duke pretenduar se në magazinat e saj janë ribërë zarfe me vota të falsifikuara nga patronazhistët.
Ai solli shembuj konkretë nga qarqe të ndryshme si Tirana, Lezha, Dibra dhe Fieri, ku numri i zarfeve të numëruara rezulton më i lartë se ai i zarfeve të dërguara nga diaspora.
Në disa raste, PS ka marrë deri në 97 përqind të votave, një rezultat që Berisha e krahasoi me Korenë e Veriut.
“Kjo është një maskaradë zgjedhore që nuk do të njihet kurrë,” deklaroi ai, duke paralajmëruar se opozita do të ndjekë çdo rrugë për të denoncuar dhe dokumentuar këtë “krim elektoral”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
