Nga Gazeta Si - Kryetari i Akademisë së Shkencave, Skënder Gjinushi tha gjatë komunikimit me median se vendimi për bashkimin e Akademisë së Studimeve Albanologjike me Akademinë e Shkencave do të rrisë kapacitetin intelektual në kërkimin shkencor shqiptar.
Gjinushi tha se Akademia ka ftuar ASA-n të bashkohen për të përfunduar 3 vepra madhore që duhet të përfundohen brenda 5 viteve. 3 projektet janë krijimi i Enciklopedisë, Fjalorit dhe Historisë, në bashkëpunim me Akademinë e Shkencave të Kosovës.
“Guxuam të marrim 3 projekte madhore që nuk kanë guxuar ti marrin institute të konsoliduara pa pasur punonjës dhe i vetmi ndikim që Akademia kishte te institucionet ishte se i ftoi të bëheshim bashkë për të përfunduar 3 vepra madhore për 5 vite dhe po të bëjmë këto 3 vepra së bashku me ASA-n, për 10 vite ne e kemi kryer misionin tonë”, thotë Gjinushi.
Ai tha për median se të gjitha fondet e marra për këto 3 projekte do të shkojnë vetëm tek hartuesit, punonjësit shkencorë dhe bashkimi i këtyre dy Akademive e bën më të lehtë përfundimin e 3 projekteve.
I pyetur nëse është e vërtetë se Akademia e Kosovës ka hequr dorë nga bashkëpunimi me Akademinë e Shqipërisë, Gjinushi tha se kjo nuk është e vërtetë dhe “nuk ka marrëdhënie më të mira ndër vite midis Akademisë së Shqipërisë me Akademinë e Kosovës se sa këto 2 vitet e fundit.
“Nuk është tërhequr Kosova për krijimin e fjalorit. Vetëm nuk ka specialistë dhe do bashkëpunojnë me ne që projekti të përfundojë”, tha Gjinushi.
Gjithashtu, Gjinushi foli edhe për fondet. Ai sqaroi se nëse ASA deri më tani i merrte fondet nga Ministria e Arsimit, tashmë do i marrin nga Akademia e Shkencave dhe do kontrollohen nga vetë drejtuesit e institucioneve që tani do quhen njësi.
Drejtues të ASA-s prej ditësh kanë shprehur se janë kundër vendimit të një bashkimi me Akademinë e Shkencave, deklaratë që Gjinushi e mohoi duke thënë se “kemi komunikuar vazhdimisht me ASA-n dhe kanë votuar pro ose thjeshtë kanë heshtur kur është diskutuar për bashkimin e dy Akademive”.
“Jemi takuar dhe në Ministri dhe kanë qenë dakord. Problemi qëndron kur bëhen bashkë se ndryshojnë mendim. Gjithsesi janë një pakicë e vogël”, tha Gjinushi, duke shtuar se Akademia e Shkencave nuk ndërhyn në shkeljet ligjore që ka hasur MAS tek ASA.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.