Ministri i Brendshëm, Sandër Lleshaj i është drejtuar me kritika një zyrtari dhe kryetarit të bashkisë së Lezhës, Pjerin Ndreu për pallatin 12 katësh, që e kanë vlerësuar si të rrezikshëm duke u kërkuar banorëve të dalin jashtë deri në një verifikim të plotë.
Qëndrimi, ka shpjeguar drejtori i urbanistikës, Nik Leka ka për synim mbrojtjen e banorëve deri sa të flasin ekspertët. Kjo cështje ka qenë burim i përplasjes me ministrin e Brendshëm.
Në video dëgjohet se Ministri Lleshaj i kërkon zyrtarit të bashkisë që të bëjë kujdes, pasi sipas tij po përhap panik. Për të qetësuar banorët, Ministri thotë se do të ishte i gatshëm të jetonte aty vetë me familjen.
“Maksimumi nesër, ose sonte do të vijnë ekspertët për t’ju hequr merakun juve. Pallatit nuk i është thyer një xham. Ajo që shoh unë është se ky është një ndër pallatet në gjendjen më të mirë që kam parë edhe në Tiranë. Unë për veten time me qenë 1 javë vij edhe rri këtu. Tek pallatet maten kolonat dhe jo muret.”- u është drejtuar banorëve Lleshaj.
Sipas të dhënave të shtabit të emergjencës në qarkun e Lezhës tërmeti ka dëmtuar 59 pallate 441 banesa si dhe 12 institucione shtetërore. Në disa prej institucioneve ka nisur verifikimi i shkallës së dëmtimeve nga ekspertë të huaj.
Reagim i Sekretarit të Përgjithshëm të PD, Gazment Bardhi
Partia Demokratike e ka cilësuar sjelljen e Ministrit të Brendshëm si jo vetëm të papërgjegjshme, por edhe kriminale.
“Ajo është dëshmi e gjallë se qeverisemi nga njerëz të pashpirt, që duan të fshehin të vërtetën, duke rrezikuar jetën e qytetarëve! Drejtori i Urbanistikës së Lezhës me profesion inxhinjer, dëshmon se godina paraqet rrezikshmëri, por Ministri i Brendshëm e urdhëron të fshehë të vërtetën se banesat janë të rrezikshme për jetën e qytetarëve.”- është shprehur Sekretarit të Përgjithshëm të PD, Gazment Bardhi.
Për të, këta qeveritarë të papërgjegjshëm, me shpirt të korruptuar janë të njëjtët individë që detyruan ekspertët të ndryshonin aktet e verifikimit për dy pallatet në Thumanë, t’i vlerësonin ato si të banueshne, duke u bërë përgjegjës për humbjen e jetës së 24 qytetarëve.
Bardhi i kërkon prokurorisë të nisë menjëherë hetimet ndaj Ministrit të Brendshëm për intimidimin e ekspertëve dhe tentativën e tij për t’u fshehur banorëve të vërtetën. Kjo sjellje, ka thënë Bardhi, është jo vetëm papërgjegjshmëri kriminale, por edhe shpërdorim i pastër i detyrës!
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.