Dy persona rezultojnë të humbur, pasi rrjedha e një përroi ka marrë përpara automjetin me të cilin po udhëtonin, në vendin e quajtur “Grykë Lugje”, në Shkrel të Malësisë së madhe. Që prej mbrëmjes së djeshme, e gjithë zona, në veri dhe verlindje të vendit, është goditur nga një mot i keq me shira të dendur, të cilat kanë vazhduar me intenstitet të lartë dhe gjatë ditës.
Sipas një njoftimi të policisë në automjetin e rrëmbyer nga rrjedha e ujit udhëtonin tre persona banorë të zonës, dhe pjesëtarë të së njëjtës familje. Vajza e cila ka mundur të dalë nga mjeti, është ndihmuar dhe nga një banor i zonës, ndërkohë që babai i saj, 50 vjeç dhe i vëllai, nuk ia kanë dalë.
“Në vendngjarje ndodhen polumbarët e RENEA-s, grupi i evakuim-shpëtimit, grupi alpin i FNSH-së Shkodër, emergjencat civile dhe shërbimet e Komisariatit të Policisë Malësi e Madhe, të cilët po punojnë për gjetjen e dy shtetasve (babë e bir)”, bën të ditur njoftimi i policisë.
Reshjet e dendura të 24 orëve të fundit po shoqërohen me dëmtime të shumta në Shkodër, Lezhë, Malësi të Madhe dhe në Vaun e Dejës. Sipas emergjencave civile, më shumë se 500 hektarë tokë bujqësore janë përmbytur, dhjetra banesa, sera dhe biznese private gjenden nën pushtetin e ujit, ndërsa energjia elektrike është ndërprerë në pjesën më të madhe të fshatrave. Disa familje janë evakuuar. Në zonë janë forcat e emergjencave civile të ndihmuara dhe nga njësi të ushtrisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.