Politike

“Babalja”, historia që “preu kokën” e Xhafajt dhe të Salianjit

Në mesin e majit të vitit të kaluar Partia Demokratike do të niste sulmin frontal ndaj ministrit të Brendshëm, Fatmir Xhafaj. Përditë nga selia blu dilnin zyrtarë dhe përfaqësues të opozitës që denonconin vëllanë e ministrit, Geron (Agron) Xhafaj se i kishte shpëtuar drejtësisë, duke mos ia dorëzuar shtetit italian. Akuza e parë do të ishte se Xhafaj kryetari i komisionit të Ligjeve kishte ndryshuar ligjin e Kodit të Procedurës Penale, duke ndihmuar që vëllai i tij të vuante dënimin në Italinë fqinje, ku ishte dënuar me 7 vjet e dy muaj burgim, të dhënë me vendimin e datës 12 tetor 2008, Gjykatës së Shkallës së Parë Leçe. Vendimi ishte lënë në fuqi nga Gjykata e Apelit e Leçes të datës 25.01.2011. Shkaku i dënimit ishte për përfshirje në trafik ndërkombëtar të lëndëve narkotike.
Por sulmet ndaj Xhafajt nuk do të ndalonin me kaq. Pas akuzave për bllokimin e ekstradimit me ndryshimet e ligjit, PD-ja do të publikonte audiopërgjimin që do të trondiste për disa muaj politikën shqiptare.


Selia blu nxori audiopërgjimin ku pretendohej një bisedë mes një trafikanti dhe Agron Xhafajt. Fillimisht u shfaq si dëshmitari “X”, i cili më vonë do të rezultonte se ishte Albert Veliu, me pseudonimin “Babalja”. Dëshmitari “X” fliste me vëllanë e Xhafajt, Agronin, duke i kërkuar ndihmë për të transportuar lëndë narkotike drejt Italisë, duke e punësuar si skafist.

Gazment Bardhi, Enkelejd Alibeaj, Ervin Salianji, gjatë një konferencës ku akuzuan Agron Xhafajn vëllain e ish-ministrit të Brendshëm, Fatmir Xhafaj. Foto LSA

“Organet ligjzbatuese kanë dijeni për aktivitetin kriminal të Agron Xhafajt si drejtues i një organizate kriminale që kontrollon trafikun e drogës. Në të kaluarën, bashkëpunëtori X dhe Agron Xhafaj kanë punuar së bashku në trafikun e drogës, por kur bashkëpunëtori X u dënua me burg në Itali, Agron Xhafaj, nuk u interesua kurrë për të”, do të deklaronin në konferencën për shtyp, Ervin Salianji së bashku me dy kolegët e partisë së tij, Gazment Bardhi dhe Enkelejd Alibeaj.

Tre ditë më pas kryedemokrati Lulzim Basha do të dilte në një konferencë për shtyp, duke deklaruar se ministri i Brendshëm dhe kryeministri po ushtronin presion ndaj dëshmitarit “X” dhe familjes së tij.
“Largimi në fshehtësi dhe me urgjencë i Agron Xhafajt, terrori dhe presioni policor dhe i bandave ndaj dëshmitarit Albert Veliu, bashkëshortes dhe fëmijëve të tij dhe aktiviteti i ethshëm për të prishur provat do të ishte i pamundur, nëse Fatmir Xhafaj nuk do të ishte më Ministri i Brendshëm. Po ai është aty jo për të mbrojtur qytetarët nga krimi, por për të mbrojtur vëllanë e tij dhe veten e tij nga ligji. E paralajmëroj sot Edi Ramën dhe Fatmir Xhafajn se, për çdo hap që do të ndërmarrin për të rrëmbyer, terrorizuar dhe vënë nën presion Albert Veliun, dëshmitarin e familjes mafioze Xhafaj dhe familjarët e tij, do të marrin përgjigjen më të ashpër nga opozita dhe populli!”, do të deklaronte Basha më 17 maj të 2018-ës.


Më pas PD do të shfaqte edhe një edhe interviste me dëshmitarin “X”, i cili shpjegonte se pse e kishte ndërmarrë këtë veprim për t’u hakmarrë ndaj Xhafajt për shkak të mos përkrahjes kur “Babalja” ishte në burg. “Po vajta se qemë me mbetqejfje, se kur unë rashë brenda në burg në Itali, ai mua nuk më solli një paketë, më ktheu kurrizin”, do të shprehej ai në intervistën e dhënë për gazetarin Jetmir Olldashi.
Pikërisht do të ishte gazetari Olldashi që do të kishte nisur një investigim për çështjet e trafikut të drogës në qytetin e Vlorës dhe kishte ndihmuar në realizimin e këtij audiopërgjimi.

Gazetari Jetmir Olldashi


Agron Xhafaj dorëzohet në Itali dhe ngre padi ndaj Salianjit

Audiopërgjimi do të sillte reagimin e vëllait të ministrit të Brendshëm. Agron Xhafaj tha se do t’i drejtohej vetë autoriteteve italiane të drejtësisë për të ekzekutuar një vendim dënimi penal të tyre kundrejt tij. “Kam vendosur që t’i drejtohem vetë autoriteteve italiane të drejtësisë për të ekzekutuar një vendim dënimi penal të tyre kundrejt meje. Kam vendosur ta bëj këtë duke u paraqitur sot në Itali tek autoritetet përkatëse. Edhe pse nuk ka pasur asnjëherë (nuk ka akoma edhe sot) asnjë kërkesë dhe asnjë interes nga organet e drejtësisë italiane për të ekzekutuar këtë vendim, edhe pse unë asnjëherë nuk kam qenë në kërkim për ekzekutimin e këtij vendimi, unë po e kryejë këtë akt”, shkruante Agron Xhafaj në letrën e tij.
Gjithashtu ai do të theksonte se kjo është një shpifje dhe një lojë politike dhe shantazh ndaj tij dhe vëllait të tij, ministrit të Brendshëm, Fatmir Xhafaj.

Faksimile e Agron Xhafajt ku bën të ditur dorëzimin në Itali dhe padinë ndaj zyrtarëve të PD-së

Por ky veprim nuk do të mbylljej me kaq, pasi i akuzuari nga PD-ja do të shkonte në prokurori për të bërë padi penale ndaj Salianjit dhe përfaqësuesve të tjerë të PD-së
Në letrën e tij, Agron Xhafaj deklaronte se edhe audio e publikuar nga PD është false. “Pranë Prokurorisë, kam deklaruar e dhënë shpjegime konform ligjit, se audio e publikuar, përfshirë efektet zanore si dhe imazhet e sajuara janë false, dhe janë bërë publike në media me qëllim shantazhin dhe presionin ndaj meje e vëllait tim, Ministër i Brendshëm. Ditën e djeshme, datë 15 Maj 2018, kam kryer të gjitha procedurat e nevojshme, të parashikuara nga ligji, përfshirë depozitimin e zërit tim pranë Prokurorisë së Tiranës dhe në prani të ekspertit të fushës, duke ofruar në këtë mënyrë të gjithë bashkëpunimin e mundur në funksion të zbardhjes së të vërtetës. Shpresoj që prokuroria dhe gjykata t’i shkojnë deri në fund hetimit penal dhe civil ndaj montazhit te paskrupullt ndaj meje e familjes time”, theksonte Xhafaj në letër.
Pas këtyre zhvillimeve, Prokuroria e Krimeve të Rënda do të niste hetimet duke thirrur për dëshmuar Jetmir Olldashin, deputetët e PD-së, Ervin Salianji, Enkelejd Alibeaj dhe ekspertin ligjor të PD-së, Gazment Bardhin. Organi i Akuzës kërkoi që të dorëzohej audiopërgjimi origjinal për të kryer verifikimin.


Rama merr në mbrojtje Xhafajn, opozita proteston
Kryeministri Edi Rama do të deklaronte se kishte kryer ekspertimin e audiopërgjimit dhe se rezultonte i pavërtetë. “Unë që ju kam thënë publikisht që kjo është një histori banale dhe audiopërgjimi është pa lidhje fare - fare me personin e akuzuar. Historia mbas audiopërgjimit është edhe më e hatashme. Çfarë shikoni janë vetëm aktorë që luajnë rolin. Kam shpresë se do dalin nga hetimi, skenaristët, regjisorët dhe producentët. Ai ditziu i rrugëve të Vlorës është si ata figurantët, ca ti thuash thotë, por historia është më serioze se duket por t’ia lëmë prokurorisë. Na duhet përgjigja e analizës shkencore, në një laborator shkencor të cilido vend partner me Shqipërinë. Kaq”, deklaroi Rama nga foltorja e Parlamentit.

Seanca e 24 Majit ku partitë u përplasen për çështjen Xhafaj

Por Basha në seancën e 24 majit do të deklaronte se “Rama dhe Xhafaj janë përfshirë në krimin e rëndë të pengimit të drejtësisë me deklaratat false për ekspertizën, me largimin nga hetimi të Agron Xhafajt, me kërcënimin e bandave mafioze të dëshmitarit. Në një situatë normale Agron Xhafaj duhet të ishte sot në qeli duke u hetuar për vepra të reja penale. Fatmir Xhafaj duhet të jepte dorëheqjen dhe t’i nënshtrohej ligjit Antimafia!”.

Ndërsa dy ditë më vonë më 26 maj, opozita do të protestonte përpara Kryeministrisë dhe do të rrethonte ministrinë e Brendshme. Pavarësisht këtyre zhvillimeve politike të tensionuara, Rama zgjodhi të mbronte ministrin Xhafaj, edhe pse kërkohej nga opozita dorëheqja e atij. Ndërsa në tetor Rama do të deklaronte se në montimin e “Babales” do të punonin dhe segmente të caktuara për të bërë puç ndaj tij dhe qeverisë.

Foto nga protesta e opozitës


Dëshmitari i rremë dhe akuzat ndaj Salianjit

Më vonë do të dilte në skenë se rolin e Agron Xhafajt, do ta bënte Fredi Alizoti, kunati i Babales. Për këtë pati edhe një video të dytë të publikuar po nga Salianji, në të cilin shfaqej Alizoti duke biseduar në një lokal të PD-së, ku theksonte se drejtori i Përgjithshëm të Policisë së Shtetit Ardi Veliu dhe kryetari i grupit të PS, Taulant Balla i kishin kërkuar që të deklaronte se ishte ai personi që kishte imituar vëllanë e Xhafajt. Kjo video e dytë në të cilën pretendon PD se ndaj Alizotit po ushtrohej presion do të realizohej nga Florenc Hoxha, ish-zyrtar i bashkisë së Tiranës, që drejtohej në kohën e Bashës.

Salianji duke shfaqur videon e dytë në emisionin "Opinion" në TV KLAN

Alizoti deklaroi më pas në prokurori se i ashtuquajturi Babalja i kishte ofruar 100 mijë euro për të realizuar imitimin e zërit Agron Xhafajt. Alizoti i pyetur në datë 01.06.2018, ka deklaruar që rreth orës 16:00, të datës 01.06.2018, kishte kërkuar të komunikonte me Drejtorin e Policisë Fier, pasi donte të deklaronte disa fakte. Më pas ka kontaktuar me Drejtorin, i cili e ka orientuar që të jepte deklarime në Prokurorinë për Krime të Rënda.

“Ky shtetas ka deklaruar që shtetasin Albert Veliu (Babalja) e njihte prej 20 vitesh. Rreth muajve Tetor - Nëntor të vitit 2017, ai i kishte thënë që donte t’i bënte një regjistrim shtetasit Agron Xhafaj, vëllai i Ministrit të Brendshëm, por nuk i gjente dot anën, pasi ai nuk e afronte. I kishte ofruar që të bënin një regjistrim dhe shtetasi Fredi Alizoti të hiqej sikur ishte shtetasi Agron Xhafaj. Për këtë shërbim “Babalja”, i kishte thënë që do të merrnin 200.000 euro nga deputeti me mbiemrin Salianji. Këtë bisedë e kishin regjistruar në Vlorë te një lokal përballë atij që kishte shtetasi Agron Xhafaj. Sipas deklaruesit, “Babalja” kishte premtuar që do t’i jepte 100.000 euro dhe zëri i shfaqur në regjistrimin e bërë publik nga televizionet në bisedë me Babalen, ishte zëri i tij. Babalja deri në këto momente nuk i ka dhënë asnjë lek”, shprehet organi i Prokurorisë.

Britania hodhi poshtë audiopërgjimin
Pikë e fortë e Prokurorisë për skandalin që pretendohej nga PD-ja ka qenë ekspertiza e britanikëve, të cilët përmes një letërporosie të përcjellë nga Ministria e Drejtësisë, thoshin se audio-përgjimi i sekuestruar nga Prokuroria nuk ishte autentik. Gjithashtu, zëri në audio-përgjim, që pretendohej se i përkiste Agron Xhafajt, nuk mund të konfirmohej se ishte i tij, pasi cilësia ishte shumë e dobët. Madje, britanikët flasin për dy zëra të ndryshëm në audio- përgjim, në rolin e Agron Xhafajt.

Fredi Alizoti në Gjykatë

Prokuroria e Krimeve të Rënda regjistroi si persona nën hetim emrat e shtetasve Albert Veliu, Fredi Alizoti, Jetmir Olldashi dhe Ervin Salianji për veprën penale të “Kallëzimit të rremë” të kryer në bashkëpunim, të parashikuar nga neni 305 e 25 i K.Penal, ndërsa për shtetasin Albert Veliu dhe për veprën penale të “Kalimit të Paligjshëm të Kufirit” të parashikuar nga neni 297 i Kodit Penal. Babalja për t’i shpëtuar drejtësisë ka kërkuar strehim politik. Fillimisht ai e kërkoi në Kosovë dhe më pas në Hungari. Kjo gjë pengoi procedurat e ekstradimit të tij drejt Shqipërisë.
Pas mbylljes së hetimeve të Prokurorisë pas afro një viti, ish-deputeti i PD-së, Ervin Salianji rrezikon dënimin nga gjobë deri ne 5 vite burg. Ndërkohë të pandehur në këtë çështje janë edhe gazetari Jetmir Olldashi, Albert Veliaj i njohur ndryshe si "Babalja" dhe Fredi Alizoti që imitoi zërin e Geron Xhafës.
Tashmë e gjithë kjo histori mbyllet me dorëheqjen e Fatmir Xhafajt si ministër i Brendshëm, në tetor 2018 pas presioneve të shumta edhe për çështjen “Babale”, si dhe burgun mund ta rrezikojnë edhe eksponentë të opozitës, si Ervin Salianji, i cili tashmë janë pa imunitet pasi kanë dorëzuar mandatin e deputetit.



Copyright © Gazeta “Si”


Më Shumë