.png)
Novak Gjokoviç, 8 herë kampion i “Australian Open”, e ka nisur këtë turne me një fitore të lehtë ndaj francezit Zheremi Shardi, i cili kapitulloi për 91 minuta, pas 3 seteve, 6-3, 6-1 dhe 6-2. Tenisti serb ka përfituar nga gabimet e kundërshtarit, sidomos në gjuajtjet e drejta dhe kthimin e topave. Francezi nuk pati as forcën fizike në këtë ndeshje, duke e bërë gjithçka më të thjeshtë për Gjokoviçin.
Gjokoviç ka funksionuar si një makinë perfekte, duke e mbyllur ndeshjen me 9 ejs dhe një gabim të vetëm të dyfishtë. Është hera e 14-të në 15 vitet e fundit që ai kalon turin e parë të “Australian Open” pa humbur asnjë set. I vetmi që i ka marrë një set në turin e parë është gjermani Jan Lenard Struf, në edicionin e kaluar.
Për Gjokoviçin është fitorja e 76-të në këtë turne dhe ai mban kështu vendin e dytë, pas Roxher Federerit me 102 fitore. Në turin e dytë serbi do të ndeshet me amerikanin Frances Tiafoe, që eliminoi Stefano Travalian.
Australianët janë në festë për suksesin e lehtë të idhullit të tyre Nik Kirgios, i cili mundi portugezin Federiko Ferreira Silva. Kirgios fitoi të gjitha pikët e rëndësishme të ndeshjes dhe në turin e dytë do të ndeshet me francezin Ugo Humbert, i cili kaloi 6-3, 6-4, 6-7 dhe 6-3 japonezin Yasutaka Uchijama.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
