.png)
Ish-kreu i Komunës së Velipojës dhe ish-deputeti i Parlamentit shqiptar, Pashk Ujka ka rënë pre e një atentati mbrëmjen e kësaj të hëne, ku mbeti i plagosur rëndë.
Ngjarja ka ndodhur në lagjen “Vasil Shanto”, pranë Lulishtes te Kisha Ortodokse në qytetin e Shkodrës, rreth orës 18:15.
Dyshimet e para janë se ndaj tij është qëlluar me armë më silenciator dhe autori ka shfrytëzuar mungesën e ndriçimit në këtë pjesë të qytetit. Në momentin që është qëlluaar, Pashk Ujka ndodhej i shoqëruar nga bashkëshortja dhe vëllai i tij, që janë marrë në pyetje nga grupi hetimor si dëshmitarë okularë të ngjarjes.
Viktima është dërguar në urgjencë në gjendje të rëndë në spitalin e Shkodrës, ku pavarësisht përpjekjeve të mjekëve, ka ndërruar jetë.
Deri më tani nuk ka një pistë konkrete, dhe nuk dihen as shkaqet e kësaj ngjarjeje të rëndë, teksa kjo është hera e dytë që Pashk Ujkës i bëhet atentat.
Pashk Ujka ka mbajtur postin e deputetit të Partisë Demokristiane nga viti 2005 deri në 2009. Në zgjedhjet lokale 2011, Ujka kandidoi po nën siglën e PDK-së, por mbështetur nga PS-ja në zgjedhjet për komunën e Velipojës, që e drejtoi deri në vitin 2015, kur kjo komunë u shkri me Bashkinë e Shkodrës pas reformës territoriale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
