.png)
Gazeta Si - Të dhënat skandaloze të skemës se si miliona lekë dyshohet se kalonin përmes një skeme nga shoqëria e inceneratorit tek të afërmit e ish ministrit tregojnë gjithashtu tjetërsimin e shoqërive kërpudhë që u tjetërsua në duart e njerëzve që ndërkohë ishin të punësuar edhe në Kuvend.
Ekskluzivisht Gazeta “Si” mësoi nga SPAK detaje nga dosja sekrete si ajo e shitjes së aksioneve të shoqërisë Sili (që kishte kryer shitje tek kompania e Ilir Kokës ) aksione tek një person i punësuar pranë kuvendit. Ai quhet Agim Seferi të cilit administratori Silver Driza i shiti aksione të shoqërisë në datë 28 qershor 2018. Por më tej në datë 5 shkurt 2020 i njëjti person emëron si administrator Drizën duke e autorizuar që të kryejë çdo veprim financiar si dhe të kishte tagra për të përfaqësuar shoqërinë.
Sipas kërkimeve të Spak, Agim Seferi sakaq ka qenë i punësuar pranë Kuvendit të Shqipërisë si specialist që mbulonte qarkun Durrës për deputetët e opozitës për periudhën 28 qershor 2019 deri më datë 17 shtator 2021.
Njëherazi Agim Seferi konsiderohet si njohje e ish ministrit Lefter Koka, ndërkohë që ortaku i ‘ Sili’ , Silver Driza rezulton të ketë qenë edhe i punësuar në autoritetin portual Durrës deri në muajin shtator 2021. Spak bën me dije se administratorë dhe punonjës të kompanive ishin të punësuar me paga të ulëta dhe se në një rast shoqëria tjetër po ashtu e përfshirë në këtë skemë ka lidhje shoqërore me djalin e ish ministrit. ‘Bëhet fjalë për shoqërinë YPV që kishte si punonjës në vitin 2016 ortakun dhe administratorin Yuri Ymeraj dhe më pas Endri Kolaci, Ervind Shehu. Por personat që kanë themeluar shoqëritë respektive Pivot 04, Sili dhe Y.P.V janë personat që kanë lidhje shoqërore me shtetasin Arbi Koka, djali i Lefter Kokës”, deklaron në rrugë zyrtare Spak për gazetën “Si”.
Të punësuar nga data 21 mars 2014- deri më 29 korrik 2018 rezulton Arbër Denizi pranë shoqërisë hekurudha shqiptare me detyrën magazinier dhe me një pagë 28 mijë lekë vijon më tej një burim hetimor pranë Spak.
Kurse Silver Driza nga prilli 2014 deri më prill 2016 rezulton i punësuar në të njëjtën shoqëri dhe me pagë mujore 20 mijë lekë. Roarbri Jaupaj që ka vepruar si përfaqësues i Y.P.v ka punuar pranë hekurudhës dhe sakaq rezulton punonjës në kantinën e Pijeve ku Lefter Koka është aksioner. Lista sipas SPAK vijon me Tomir Haxhiraj që edhe ai ka vepruar si përfaqësues I ‘Y.P.V’ dhe që ka pasur pozicionin e anëtarit të këshilltarit mbikëqyrës në kantinën e ish ministrit.
Spak këmbëngul se lidhjet shoqërore me djalin e ish ministrit provohen edhe nga udhëtimet e përbashkëta , si ai i datës 28 nëntor 2018 kur Arbi Koka ka udhëtuar me automjet privat së bashku me Silvester Driza dhe më pas sërish një udhëtim i dytë i datës 2 tetor 2019”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
