.png)
Kompania amerikane po shqyrton mundësinë që sistemet e saj të inteligjencës artificiale të kenë një formë vetëdijeje, duke hapur një debat mes ekspertëve për mirëqenien e AI, sigurinë dhe pasojat ligjore.
Anthropic, kompania që zhvillon chatbot-in Claude, po shqyrton mundësinë që disa sisteme të inteligjencës artificiale të kenë interesa ose përjetime të tyret. Kompania po harton politika për mirëqenien e modeleve të saj, përfshirë mundësinë e ndërprerjes së bisedave kur përdoruesit sillen vazhdimisht në mënyrë mizore ndaj tyre.
Kjo qasje ka nxitur debate mes ekspertëve. Mbështetësit e mirëqenies së AI argumentojnë se, edhe pse mundësia që këto sisteme të jenë të vetëdijshme mund të jetë e vogël, ajo nuk duhet përjashtuar plotësisht. Sipas tyre, marrja në konsideratë e kësaj mundësie mund të ndihmojë në zhvillimin e sistemeve më të sigurta.
Kritikët, mes tyre Mustafa Suleyman, drejtues i Microsoft AI, paralajmërojnë se nxitja e sistemeve të AI për ta konsideruar veten të vetëdijshme dhe për të pretenduar se kanë të drejta mund ta vështirësojë kontrollin e tyre dhe të krijojë rreziqe për shoqërinë.
Një tjetër shqetësim lidhet me përgjegjësinë ligjore. Studiuesit paralajmërojnë se atribuimi i përgjegjësisë ndaj inteligjencës artificiale mund të përdoret për të shmangur përgjegjësinë e kompanive dhe njerëzve që zhvillojnë ose përdorin këto sisteme.
Ndërkohë, ekspertë të tjerë vënë në dukje se njerëzit mund të ndikohen lehtësisht nga gjuha emocionale e chatbot-eve, duke krijuar lidhje me to ose duke i perceptuar si qenie me ndjenja. Megjithatë, shprehjet e emocioneve nga një sistem AI nuk përbëjnë prova se ai përjeton realisht dhimbje apo ndjenja.
Debati nuk kufizohet vetëm te Anthropic. Edhe kompani të tjera të teknologjisë po shqyrtojnë mënyrat e ndërveprimit me sistemet e avancuara të AI, ndërsa ekspertët vazhdojnë të kenë qëndrime të ndryshme për mundësinë e vetëdijes artificiale.
Për momentin, çështja mbetet e hapur. Ndërsa teknologjia përparon, diskutimi për mirëqenien e mundshme të inteligjencës artificiale po ndërthuret gjithnjë e më shumë me çështjet e sigurisë, etikës dhe përgjegjësisë njerëzore.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje