Numri i aksidenteve dhe fataliteteve në total në 4 muajt e parë të këtij viti ka shënuar rënie.
Sipas të dhënave të INSTAT-it, në muajin prill numërohen 92 aksidente rrugore nga 104 aksidente të ndodhura në të njëjtin muaj të vitit të shkuar, duke u ulur me 11.5%, krahasuar me të njëjtën periudhë të një viti më parë.
“Në katërmujorin e parë të vitit 2022, numërohen 377 aksidente rrugore nga 427 aksidente, të ndodhura në të njëjtën periudhë të një viti më parë, duke u ulur me 11.7%.
Në muajin Prill 2022, numri i të aksidentuarve (të vrarë dhe të plagosur) është 132 persona nga 145 që ishte në të njëjtën muaj të një viti më parë. Në katërmujorin e parë të vitit 2022, numri i të aksidentuarve është 524 persona nga 563 persona të aksidentuar në të njëjtën periudhë të një viti më parë”, vlerëson INSTAT.
Numri i të vdekurve nga aksidentet rrugore në muajin prill është 10 persona, nga 12 persona të vdekur në Prill 2021. Në katërmujorin e parë të vitit 2022, numri i të vdekurve nga aksidentet rrugore është 56 persona nga 70 persona të vdekur në katërmujorin e parë të vitit 2021.
Ajo që mbetet e pandryshuar është që në shumicën e rasteve shkak për aksidentet është sjellja e shoferëve.
“Në muajin Prill 2022, aksidentet rrugore, në 84.8 % të rasteve, kanë ndodhur si pasojë e sjelljes së drejtuesit të mjetit. Numri më i lartë i aksidenteve në këtë periudhë është kryer nga grup-mosha 45 – 59 vjeç, duke zënë 23.9% të numrit të aksidenteve gjithsej.
Aksidentet në këtë grup-moshë janë ulur me 4.3%, krahasuar me të njëjtën periudhë të një viti më parë. Në katërmujorin e parë të vitit 2022, aksidentet rrugore, në 13.3% të rasteve, kanë ndodhur si pasojë e sjelljes së këmbësorit. Gjatë kësaj periudhe, numri i aksidenteve sipas sjelljes së këmbësorit është ulur me 39.0%, krahasuar me të njëjtën periudhë të një viti më parë”, thuhet në dokument.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.