Stambolli ishte aeroporti i fundit që mbylli fluturimet komerciale me Shqipërinë dhe me këtë vendim të autoriteteve turke, Ambasada Amerikane njoftoi përmes një postimi në rrjetet sociale se po punonte për gjetjen e rrugëve alternative për shtetasit amerikanë që dëshironin të largoheshin nga vendi ynë.
Ambasada nuk dha më shumë hollësi dhe nuk përmendi emër kompanie, fluturimi dhe as destinacioni, por vendosi datën 1 prill thirrjen e fundit për të gjithë shtetasit amerikanë që donin të largoheshin.
Misioni është përmbushur me anë të “Air Albania”. Ambasada e zbuloi vetë këtë të mërkurë po përmes rrjeteve sociale, duke falenderuar kompaninë dhe Qeverinë shqiptare për largimin e 64 shtetasve amerikanë.
Pra, shtetasit amerikanë janë larguar nga Shqipëria duke shfrytëzuar fluturimet e posaçme të kompanisë “Air Albania” në Europë për të marrë shtetasit shqiptarë që kanë mbetur të bllokuar pas mbylljes së kufijve.
Këto fluturime nuk u shfrytëzuan vetëm nga amerikanët. Edhe shtetas gjermanë u larguan nga Shqipëria përmes “Lasgushit”.
“Falënderojmë qeverinë shqiptare për ndihmën në riatdhesimin e turistëve gjermanë të bllokuar në Shqipëri. Një fluturim i Air Albania u nis dje drejt Memmingen. Shumë faleminderit!”, deklaroi Ambasada Gjermane më 30 mars.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
