Asnjë spital privat nuk është i certifikuar për të kryer analizat mjekësore dhe teste tek qytetarët për të provuar nëse janë të prekur nga koronavirusi apo jo.
Agjencia Kombëtare e Barnave dhe Pajisjeve Mjekësore ka reaguar publikisht pas qarkullimit në rrjetet sociale dhe në disa media elektronike të lajmit se testet për Covid-19 ofrohen edhe nga spitalet private në Shqipëri.
“Agjencia Kombëtare e Barnave dhe Pajisjeve Mjekësore deri më tani nuk ka lëshuar asnjë Certifikatë regjistrimi për Reagentët In Vitro për subjektet private, për diagnostikimin e COVID-19”, thuhet në njoftimin e AKBPM-së.
Aktualisht, testet që njihen edhe nga Instituti i Shëndetit Publik kryhen nga laboratori i këtij të fundit, i certifikuar nga Organizata Botërore e Shëndetësisë, ndërsa Ministria e Shëndetësisë paralajmëroi pak ditë më parë se do të pajisë edhe laboratorin e Qendrës Spitalore Universitare “Nënë Tereza” me materialet e nevojshme për kryerjen e këtyre testeve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
