.png)
Gazeta Si – Gjykata e Lartë ka vendosur të rrëzojë kërkesën për sigurimin e padisë të paraqitur nga kompanitë “Vlora International Airport” dhe “2A Group”, e lidhur me biznesmenin Valon Ademi, duke i dhënë të drejtë për administrimin, biznesmenit Behgjet Pacolli.
Trupa gjykuese e Kolegjit Civil, vendosi të ndryshojë vendimet e mëparshme të Gjykatës së Shkallës së Parë Tiranë dhe Gjykatës së Apelit Tiranë, të cilat kishin pranuar kërkesën për masë sigurimi padie.
Kjo masë kishte si qëllim pezullimin e përkohshëm të disa vendimmarrjeve dhe procedurave administrative brenda shoqërisë koncesionare që menaxhon projektin e Aeroportit të Vlorës.
Në thelb, mosmarrëveshja mes palëve lidhet me kontrollin dhe administrimin e kompanisë koncesionare “Vlora International Airport”.
Konflikti lindi pasi “2A Group” pretendoi se kishte fituar të drejtën mbi një pjesë të konsiderueshme të aksioneve të shoqërisë, ndërsa kompania “Mabco” e biznesmenit Behgjet Pacolli kundërshtoi këtë pretendim dhe kërkoi pavlefshmërinë e kontratës së transferimit të kuotave.
Përplasja mes ortakëve u shoqërua me procese gjyqësore, akuza reciproke dhe tensione për kontrollin e vendimmarrjes në shoqërinë që po ndërton aeroportin.
Kjo përplasje çoi më 16 maj në bllokimin e punës në aeroportin e Vlorës, ku shoqëria “A2 Group” nuk lejoi hyrjen në kantierin e ndërtimit të punonjësve dhe nënkontraktorëve të “Mabco”-s.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje