.png)
Mbrëmjen e së enjtes u raportua në lidhje me një incident i cili ndodhi me presidentes së Kosovës Vjosa Osmani, në Aeroportin e Shkupit.
Sigurimi i aeroportit (TAV) i kishte kërkuar asaj telefonin dhe çantën ndërkohë që kjo e fundit kishte refuzuar që t’i jepte.
Pas kësaj ngjarje kanë reaguar Ministria e Brendshme maqedonase dhe Ministria e Jashtme e Kosovës.
Ditën e sotme ka ardhur edhe reagimi i Aeroportit Ndërkombëtar të Shkupit.
Në këtë reagim thuhet se secili pasagjer duhet të kontrollohet pasi punonjësit e kanë obligim ligjor që ta bëjnë, ndonëse aty nuk përmendet fare emri i drejtueses së shtetit të Kosovës.
“Prandaj, Departamenti i Sigurisë i TAV Maqedoni, në kuadër të kompetencave të veta, ka bërë kontroll standard të sigurisë së pasagjerit të përmendur si dhe bagazhit të tij, në pikën e kontrollit të sigurisë në sallonin VIP. Duam të theksojmë se siguria e aviacionit nuk është kërcënuar, sepse ngjarja e përmendur ka ndodhur në hapësirën publike të aeroportit, pra përballë pikës së kontrollit të sallës së VIP-ave, nga ku pasagjerët VIP, pasi janë kontrolluar nga Sigurimi, dërgohen në zonën e kontrolluar nga aeroporti. Gjithashtu duam të theksojmë se salla e VIP-ave është një ndërtesë e veçantë e izoluar nga ndërtesa kryesore e terminalit të Aeroportit të Shkupit, që do të thotë se është plotësisht e rreme se është cenuar siguria e udhëtarëve”, thuhet në reagimin e TAV.
Për të marrë një pasqyrë të saktë të ngjarjes dhe për të parandaluar përhapjen e dezinformatave, për të gjitha detajet në lidhje me incidentin, i drejtojmë mediat që të kontaktojnë institucionet kompetente, u tha nga TAV./Zëri/
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
