.png)
Bashkëpiloti i avionit të Flydubai që sulmoi kapitenin gjatë fluturimit Dubai-Tel Aviv dyshohet se kishte planifikuar ta përplaste avionin në aeroportin Ben Gurion ose në një ndërtesë të lartë në Tel Aviv.
Sipas raportimeve nga mediat amerikane dhe izraelite, bashkëpiloti, i identifikuar si Hamam al-Hammami, sulmoi kapitenin gjatë fluturimit FZ1073. Pasagjerët arritën ta neutralizonin, ndërsa një anëtar tjetër i ekuipazhit mori kontrollin dhe e uli avionin në Arabinë Saudite.
Autoritetet e Emirateve të Bashkuara Arabe e kanë cilësuar incidentin si një tentativë për akt terrorist. Sipas burimeve të cituara nga mediat, bashkëpiloti kishte planifikuar të vazhdonte drejt Tel Avivit dhe më pas të përplaste Boeing 737 MAX, me më shumë se 180 persona në bord, në aeroport ose në një ndërtesë të lartë.
Hetuesit po shqyrtojnë gjithashtu të kaluarën e tij dhe dyshimet se ai kishte shfaqur më herët pikëpamje ekstremiste. Raportohet se kishte punuar më parë për Oman Air, ku ishte larguar nga detyra e fluturimit dhe ishte transferuar në një pozicion administrativ.
Incidenti ka ngritur pikëpyetje serioze mbi kontrollet e sigurisë dhe verifikimin e ekuipazhit për fluturimet drejt Izraelit. Autoritetet izraelite dhe ato të Emirateve po hetojnë rrethanat e plota të ngjarjes, ndërsa Australia po shqyrton gjithashtu lidhjet e bashkëpilotit me vendin, ku raportohet se kishte studiuar.
Hetimi pritet të përcaktojë motivin e saktë të sulmit dhe nëse bashkëpiloti ka vepruar i vetëm apo ka pasur kontakte me persona ose organizata të tjera.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje