.png)
Ndërsa zjarret masive, valët e të nxehtit dhe fenomenet ekstreme të motit po bëhen një tipar i përhershëm i verës europiane, kompanitë e sigurimeve paralajmërojnë se rajoni po përballet me një “hendek të madh mbulimi”, pasi kostot e rikuperimit nga katastrofat po rriten më shpejt se mbulimi nga sigurimet.
Një zjarr gjigant që përfshiu zona të Francës dhe Spanjës nisi në korrik dhe ka shkatërruar më shumë se 300 mijë hektarë tokë, në atë që është përshkruar si një “goditje e fortë” për ekonomitë lokale. Më së fundmi, edhe Greqia u përball me një valë zjarresh, të përkeqësuar nga erërat që arritën deri në 100 kilometra në orë.
Ndërkohë, Europa është përfshirë nga disa valë të të nxehtit gjatë kësaj vere, të cilat kanë sjellë alarme të kuqe, paralajmërime për rrezik të drejtpërdrejtë për jetën dhe thatësira, ndërsa temperaturat kanë kaluar rregullisht 40 gradë Celsius.
Disa prej kompanive më të mëdha të sigurimeve në Europë thanë se rajoni nuk është përgatitur mjaftueshëm për t’u përballur me rrezikun e zjarreve dhe katastrofave të tjera natyrore, duke lënë një pjesë të konsiderueshme të dëmeve financiare pa mbulim sigurimi.
Drejtori ekzekutiv i Zurich Insurance Group, Mario Greco, tha se të gjitha rreziqet e lidhura me motin mund të sigurohen, por kostot për t’u përballur me to po bëhen gjithnjë e më të larta.
“Ne kemi shumë përvojë nga SHBA-ja dhe Australia që tregon se zjarret mund të parandalohen dhe të kufizohen, por kjo kërkon ndërhyrje sistematike. Shpesh vendet, autoritetet lokale dhe qeveritë nuk janë gati ta bëjnë këtë, sepse ende nuk e perceptojnë plotësisht rrezikun. Por rreziku ekziston”, tha Greco në një intervistë për CNBC.
Moti ekstrem mund të rëndojë edhe buxhetet publike të vendeve, pasi kostot për ftohjen, shëndetësinë, infrastrukturën emergjente, transportin dhe bujqësinë ndikojnë në ekonominë në tërësi.
Sipas një raporti të Allianz Commercial, kompanitë e sigurimeve paguan 56.3 miliardë dollarë për dëmet e shkaktuara nga zjarret gjatë viteve 2010, gjashtë herë më shumë se 8.7 miliardë dollarët e paguar gjatë viteve 2000. Sektorët më të prekur janë energjia dhe shërbimet publike, pasuritë e paluajtshme, ndërtimi, bujqësia dhe transporti.
Hendeku i mbulimit nga sigurimet
Zjarret shkatërruese në Los Angeles në janar të vitit të kaluar treguan përmasat e dëmeve ndaj pasurive të disa prej banorëve më të pasur të SHBA-së. Kompanitë e risigurimit Munich Re dhe Hannover Re përllogaritën së bashku 1.9 miliardë dollarë dëme vetëm në tremujorin e parë të vitit 2025.
Sipas Swiss Re Institute, zjarret në Los Angeles ishin ngjarja më e kushtueshme e zjarreve në shkallë globale, me 40 miliardë dollarë dëme të siguruara. Ato kontribuuan gjithashtu në rritjen e dëmeve të siguruara nga katastrofat natyrore në vitin 2025, të cilat pritet të arrijnë në 107 miliardë dollarë.
Sipas përllogaritjeve të Financial Times, deri në fund të korrikut, kostoja totale e zjarreve dhe valëve të të nxehtit në pesë vende të eurozonës më të ekspozuara ndaj tyre, përfshirë Greqinë, Spanjën, Portugalinë dhe Rumaninë, arriti në rreth 3.1 miliardë euro. Kjo është më shumë se vlerësimi mesatar prej 2.5 miliardë eurosh në vit për të gjithë Bashkimin Evropian.
Në krahasim me SHBA-në, një pjesë e madhe e pasurisë në Evropë mbetet e pasiguruar ndaj katastrofave natyrore, tha Anders Malmström, drejtor financiar i Swiss Re.
“Ekziston ende një hendek në mbulim, veçanërisht në Evropë. Kjo do të thotë se këtu ka shumë pasuri, por ajo nuk mbrohet përmes sigurimeve. Gjithçka nis me vlerësimin e rrezikut, më pas me masat për zbutjen e tij dhe në fund me përcaktimin e çmimit të rrezikut, në mënyrë që sigurimi të mbulojë atë pjesë që mbetet”, tha Malmström.
Ai shtoi se ekspozimi ndaj rrezikut është rritur ndërsa pasuria është përqendruar gjithnjë e më shumë në zonat e rrezikuara dhe banesat janë bërë më të shtrenjta.
“Pra, kemi një kombinim të më shumë ngjarjeve me ndikim më të madh dhe, në të njëjtën kohë, më shumë pasuri që duhet mbrojtur në këto zona. Të dyja së bashku rrisin rrezikun në përgjithësi për shoqërinë”, tha Malmström.
Drejtori ekzekutiv i Zurich Insurance, Greco, tha se kompania vijon të bashkëpunojë me qeveritë dhe autoritetet lokale për t’i ndërgjegjësuar ato mbi rreziqet. Kompania ka krijuar edhe një njësi të quajtur “Resilient Solutions”, e cila ndihmon klientët të krijojnë masa parandaluese dhe zgjidhje për reduktimin e rreziqeve, nga siguria kibernetike te ndryshimet klimatike.
Ndërsa Evropa përballet me fenomene gjithnjë e më ekstreme të motit, industria e sigurimeve do të ketë një rol të rëndësishëm në forcimin e qëndrueshmërisë dhe mbështetjen financiare të vendeve, tha Andrew Buchanan, drejtor financiar i Munich Re.
“Ekziston një aspekt njerëzor dhe shoqëror në të gjithë këtë”, tha ai, duke shtuar se kompanitë e sigurimeve mund të ndihmojnë që likuiditeti të jetë i disponueshëm në periudha krizash, kur njerëzit dhe bizneset përballen me momentet më të vështira.
Si Zurich Insurance, ashtu edhe Munich Re thanë se kompanitë e tyre kanë ekspozim të kufizuar ndaj zjarreve në Evropë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje