.png)
Gazeta Si – Të martën në mëngjes u mbajt ceremonia mortore për ish-futbollistin Franco Baresi – kapitenin legjendar të AC Milan dhe të kombëtares italiane – i cili ndërroi jetë të premten në moshën 66-vjeçare.
Ai konsiderohej si një nga mbrojtësit më të mëdhenj në historinë e këtij sporti. Ceremonia u zhvillua në Bazilikën e Sant’Ambrogio-s, në qendër të Milanos.
Edhe pse ajo filloi në orën 11:00, turma njerëzish ishin mbledhur tashmë jashtë kishës disa orë më parë; shumë prej tyre mbanin veshur fanellat e AC Milan ose mbanin flamujt e skuadrës.
Mes të pranishmëve kishte ish-lojtarë të AC Milan dhe figura të tjera nga bota e futbollit. Ndër ata që morën pjesë ishin Paolo Maldini, Marco Van Basten dhe Daniele Massaro – ish-shokë skuadre të Baresit te Milani gjatë fundit të viteve ’80 dhe fillimit të viteve ’90, një epokë tejet e suksesshme që i dha ekipit pseudonimin “Grande Milan”.
Megjithatë, një mungesë e dukshme ishte ajo e Arrigo Sacchi-t, trajnerit të ekipit gjatë asaj periudhe. Klubi përfaqësohej nga pronari aktual Gerry Cardinale, presidenti Paolo Scaroni dhe lojtarët Christian Pulisic e Santiago Giménez (të dy aktualisht të dëmtuar dhe që nuk po marrin pjesë në ndeshjet që pjesa tjetër e skuadrës po luan në Australi).
I pranishëm ishte edhe kryetari i bashkisë së Milanos, Giuseppe Sala; ai kishte shpallur një ditë zie në të gjithë qytetin, çka bëri që flamujt në të gjitha zyrat bashkiake të uleshin në gjysmështizë.
Të pranishëm të tjerë të shquar ishin ish-futbollisti Roberto Baggio, drejtori i ri teknik i kombëtares italiane Claudio Ranieri dhe ministri i Sportit, Andrea Abodi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje