.png)
Nga Gazeta ‘Si’- Sektori bankar në Shqipëri ka forcuar ndjeshëm aftësinë për t’u përballur me kriza financiare, sipas raportit gjashtëmujor të Bankës së Shqipërisë për ndërhyrjen e jashtëzakonshme.
Pesë bankat më të mëdha të tregut, të cilat përfshihen në kërkesën MREL (minimumi i kapitalit dhe detyrimeve të afta për t’u përdorur në rast krize), kanë përmbushur plotësisht objektivat e ndërmjetëm dhe kanë mbyllur edhe hendekun drejt objektivit përfundimtar të vitit 2027. Këto banka përbëjnë rreth 73% të aktiveve të sistemit bankar.
Sipas Bankës së Shqipërisë, në fund të vitit 2025 niveli mesatar i MREL arriti në 25.1% të aktiveve të ponderuara me rrezik, duke tejkaluar objektivin e ndërmjetëm dhe duke kaluar për herë të parë edhe objektivin final, me një diferencë pozitive të lehtë.
Struktura e financimit mbetet e mbështetur kryesisht te kapitali bazë, ndërsa është rritur përdorimi i instrumenteve të borxhit (obligacioneve), duke reflektuar një orientim më të madh drejt tregut të kapitaleve.
Gjatë vitit 2025, bankat kanë qenë aktive në emetimin e obligacioneve, ndërsa blerësit kryesorë kanë qenë individët, të cilët përbëjnë shumicën dërrmuese të investitorëve. Afatet e këtyre instrumenteve variojnë nga 3 deri në 7 vite.
Sa i përket kostove, normat e interesit në lek kanë mbetur të qëndrueshme, ndërsa në euro dhe dollar janë rritur lehtë. Megjithatë, Banka e Shqipërisë vlerëson se këto kosto mbeten të përballueshme dhe nuk paraqesin rrezik për stabilitetin e sektorit.
Në përgjithësi, raporti e vlerëson sektorin bankar më të kapitalizuar dhe më të përgatitur për skenarë krizash, me kapacitete të forcuara dhe varësi më të ulët nga ndërhyrjet publike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje