.png)
Gazeta Si – Hetimet për vrasjen makabre të 26-vjeçarit italian, Francesco Diviesti më 25 prill 2025 në Puglia të Italisë, me të dyshuar kryesor Igli Kamberin, çoi në zbulimin e veprimtarisë kriminale të grupit të drejtuar nga ky i fundit, të dyshuar në fushën e pastrimit të parave të pista me prejardhje kryesisht nga trafiku i drogës.
SPAK zhvilloi në orët e para të mëngjesit të kësaj të marte, në bashkëpunim me Antimafian e Barit një operacion nga ku u lëshuan në total 15 masa sigurie, 10 prej të cilave nga SPAK. 11 masa janë lëshuar për shtetas shqiptarë dhe 4 italianë, (përfshirë 4 gra, të vendosura nën masën e arrestit në shtëpi dhe detyrim paraqitje).
Masat u ekzekutuan në bazë të një urdhër arresti ndërkombëtar në Tiranë, Fier, Vlorë, në Barletta, në burgun e Romës dhe Agnani, si dhe në Madrid.
Masa e sigurisë “arrest me burg” i është komunikuar në qeli në Itali, Igli Kamberit, i cili është arrestuar për posedim të 24 kg kokainë më parë e tashmë ndaj tij rëndon dhe akuza e vrasjes ndaj të riut italian.
Në Shqipëri është arrestuar dhe Ergys Kastrati, bashkëshortja e tij, Desmira Ceco e 2 të tjerë të dyshuar si shoferë që bënin transportin e parave të pista.
Sekuestrimi i pasurive deri në 1 milion euro
Në total, GJKKO ka sekuestruar rreth 1 mln euro pasuri që u përkisnin bashkëpunëtorëve dhe familjarëve të Igli Kamberit.
Sips njoftimit të SPAK, janë sekuestruar 8 automjete, 10 llogari bankare dhe 4 shoqëri tregtare dhe 680.595 euro cash.
Këto të fundit të kapura në Muriqan në vitin 2024 teksa po tentohej futja e tyre në Shqipëri nga Mali i Zi me automjet nga Lefter Nelaj. Familjarëve të Kamberit u janë sekuestruar mbi 412 mijë euro cash.
Procedimi penal u regjistrua nga Prokuroria e Shkodrës dhe me pas çështja i kaloi SPAK. Hetimet treguan që këto para ishin të lidhura me ketë grup kriminal.
Vrasja e italianit
I dyshuari kryesor për vrasjen e Francesco Diviesti, është Igli Kamberi. Diviesti u dërgua brenda disa shpellave, pranë një zonë të izoluar në Murgia-n e sipërme, në Casosa di Puglia, ku është qëlluar 5 herë nga dy pistoleta dhe më pas, i është vënë flaka brenda disa gomave, me qëllim që kufoma të digjej, sipas një metode të përdorur në vitet ’90, në këtë zonë.
Kufoma është gjetur pas 4 ditësh ndërsa Igli Kamberi u arrestua 2 ditë pas vrasjes, jo për këtë ngjarje, por për posedim të 24 kilogramëve kokainë. Kamberi u prangos në Roske të Hungarisë teksa ishte nisur me autobus drejt Shqipërisë.
Anëtarët e grupit kriminal dyshohen për veprën penale “pastrim parash në kuadër të grupit të strukturuar kriminal”. Ndaj tyre rëndojnë edhe akuza të tjera që lidhen me aktivitetin kriminal të organizuar.
SPAK
Gjatë konferencës së përbashkët për shtyp me palën italiane, kreu i SPAK, Klodian Braho, konfirmoi se janë sekuestruar plot 1 milion euro cash, duke theksuar se 10 nga masat e sigurisë janë lëshuar nga Prokuroria e Shkallës së Parë në Tiranë.
Gjatë fjalës së tij, prokurori i SPAK, Vladimir Mara tha se kjo është skuadra e gjashtë hetimore mes SPAK dhe Antimafias së Barit. Sipas tij hetimet të cilat zbërthyer zinxhir e këtij grupi kriminal, kanë nisur që në vitin 2018.
Ai shtoi se tashmë nuk bëhet më fjalë për grupe kriminale më kombësi, por grupe të strukturuara kriminale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje