.png)
Nga Gazeta ‘Si’- Partia Demokratike ka depozituar në Kuvend kërkesën për ngritjen e një Komisioni Hetimor në lidhje me skandalin e AKSHI-t.
Në kërkesën drejtuar kryetarit të Kuvendit, Niko Peleshi, PD evidenton akuzat e ngritura nga SPAK ndaj ish drejtueses së AKSHI-t, Mirlinda Karçanaj, zëvendëses Hava Delibashi, dy biznesmenëve Ergys Agasi dhe Ermal Beqiri si dhe zyrtari të policisë, Erion Ismaili, për të cilët Prokuroria ka ngritur akuzat e heqjes së paligjshme të lirisë, shkeljes së barazisë në tendera, pastrim parash si edhe grup i strukturuar kriminal.
Në kërkesë, PD kërkon vlerësimin e sigurisë kibernetike dhe mbrojtjes së të dhënave të qytetarëve, si dhe analizimin e rreziqeve për sigurinë kombëtare dhe detyrimet e Shqipërisë si vend anëtar i NATO-s.
PD thekson se puna e AKSHI‑t duhet të vihet nën kontroll parlamentar për të sqaruar mënyrën se si janë trajtuar informacionet e ndjeshme.
“Kërkesa për ngritjen nga Kuvendi të një komisioni hetimor, përmbush tri kriteret kushtetuese si vijon: (i) çështja ka të bëjë me funksionin ligjvënës dhe funksione të tjera për të cilat Kuvendi është i autorizuar të marrë masa ligjore; (ii) objekti i hetimit fokusohet në një çështje konkrete; dhe (iii) ekzistojnë të dhëna dhe indicie të mjaftueshme që dëshmojnë për ekzistencëne problematikave dhe dyshimeve të arsyeshme lidhur me ligjshmërinë e veprimeve dhe mosveprimeve të institucioneve dhe zyrtarëve shqiptarë në funksionimin e Agjencisë Kombëtare të Shoqërisë së Informacionit (AKSHI), në administrimin e procedurave të prokurimit publik, në garantimin e sigurisë kibernetike, në mbrojtjen e të dhënave të qytetarëve, si dhe në administrimin e infrastrukturës digjitale kritike të shtetit.”, thuhet në kërkesë.
Kërkesa për ngritjen e Komisionit Hetimor është dorëzuar formalish në Kuvend dhe tani pritet shqyrtimi nga deputetët dhe diskutimi në seancë plenare. Sipas rregullave parlamentare, një komision i tillë mund të krijohet kur mbështetet nga një numër i mjaftueshëm deputetësh, dhe më pas emërohen anëtarët që do të nisin hetimet e nevojshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje