.png)
Çmimet e naftës kanë vazhduar rritjen paralelisht me sulmet në Iran, që kanë shkurtuar ndjeshëm prodhimin në botë.
Nafta Brent u rrit me 2.35 dollarë në 83.75 dollarë për fuçi ndërsa ajo e Teksasit u rrit me 2.42 në 77.08 dollarë/fuçi.
Nga ana tjetër edhe Kina po ushtron presion mbi tregjet e naftës pasi ka ndaluar eksportet e naftës dhe benzinës.
Tregjet e naftës mbeten të tensionuara për shkak të rreziqeve të vazhdueshme për furnizimin pas sulmeve në Lindjen e Mesme, me shqetësim kryesor mbi rrjedhën e tregtisë përmes Ngushticës së Hormuzit.
Rreth 300 cisterna nafte po qëndrojnë brenda Ngushticës, pasi trafiku i anijeve në hyrje dhe dalje nga kjo pikë kyç pothuajse u ndal pas shpërthimit të konfliktit. Forcat iraniane kanë goditur anije nafte në ose pranë Hormuzit. Shpërthime u raportuan gjatë natës pranë një cisterne afër Kuvajtit, sipas Operacioneve Detare të Tregtisë së Mbretërisë së Bashkuar.
Irani hodhi një valë raketash ndaj Izraelit herët të enjten, duke detyruar miliona banorë të futeshin në strehimore kundër bombave, teksa konflikti hyri në ditën e gjashtë, dhe vetëm pak orë pasi përpjekjet për të ndaluar sulmet amerikane u bllokuan në Uashington.
Të mërkurën, një nëndetëse amerikane fundosi një anije lufte iraniane pranë Sri Lankës, duke vrarë të paktën 80 persona, ndërsa mbrojtja ajrore e NATO-s shkatërroi një raketë balistike iraniane të nisur drejt Turqisë.
Përshkallëzimi erdhi ndërsa djali i fuqishëm i liderit të vrarë suprem të Iranit u shfaq si favorit për të pasuar të atin, duke sugjeruar se Teherani nuk do të dorëzohej ndaj presionit pesë ditë pas nisjes së fushatës ushtarake nga SHBA dhe Izraeli, e cila ka shkaktuar qindra viktima dhe ka trazuar tregjet globale.
Iraku, prodhuesi i dytë më i madh i naftës në Organizatën e Eksportuesve të Naftës (OPEC), ka ulur prodhimin me rreth 1.5 milionë fuçi në ditë për shkak të mungesës së magazinimit dhe rrugës për eksport, thanë zyrtarë për Reuters.
Katari, prodhuesi më i madh i gazit të lëngshëm natyror në Gjirin Persik, shpalli paaftësinë për të përmbushur kërkesat e eksporteve të gazit, me burime që thanë se kthimi në nivelet normale të prodhimit mund të marrë të paktën një muaj.
Ari
Çmimet e arit, po ashtu u rritën të enjten, të nxitura nga kërkesa për siguri për shkak të luftës në Lindjen e Mesme, megjithatë një dollar më i fortë dhe shqetësimet për politikën monetare të Rezervës Federale të SHBA kufizuan fitimet.
Ariu rrit me 0.4 për qind në 5.156,11 dollarë për onz, ndërsa kontratat e arit të SHBA për dërgesën e prillit u rritën me 0.7 për qind në 5.168,20 dollarë.
Ari, i cili arriti një rekord prej 5.594,82 dollarë në janar, fillimisht u rrit mbi 5.400 dollarë të hënën, pasi nisja e luftës ajrore SHBA-Izrael ndaj Iranit nxiti kërkesën për siguri, por më pas u tërhoq paksa nga ato nivele, teksa dollari gjithashtu përfitoi nga fluksi drejt sigurisë.
“Nga njëra anë, mund të ketë një kërkesë më të madhe për ari si siguri për shkak të konfliktit në Lindjen e Mesme,” tha Hamad Hussain, ekonomist për klimën dhe mallrat në Capital Economics.
“Nga ana tjetër, rreziku i një periudhe të gjatë me çmime më të larta energjie që heq mundësinë e uljes së normave, dhe shton mundësinë e rritjes së tyre, mund të kufizojë fitimet e mëtejshme.”/Reuters
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje