.png)
Gazeta Si – Në një seancë gjyqësore që zgjati rreth dy orë, Gjykata e Vlorës caktoi masën e sigurisë “arrest në burg” ndaj Bertil Alliajt, i cili katër ditë më parë ekzekutoi me armë zjarri djalin e xhaxhait të tij, Dalan Alliaj.
Seanca u zhvillua nën masa të rrepta sigurie dhe me dyer të mbyllura, ndërsa Bertil Alliaj u shoqërua për në sallën e gjyqit nga Forcat e Ndërhyrjes së Shpejtë.
Para gjyqtarëve të çështjes, Alliaj ka ngurruar sërish të tregojë motivin e vërtetë të vrasjes: “Nuk jam në gjendje të flas, jam dakord me çdo gjë që thotë avokati”.
Shkaqet e kësaj vrasjeje mbeten ende të paqarta. Megjithatë, ajo vjen si një kronikë e paralajmëruar, për shkak se Bertil Aliaj kishte qenë i përfshirë në një tjetër ngjarje të rëndë kriminale vite më parë.
32-vjeçari ishte dënuar në mungesë me 35 vjet burg për vrasje dhe armëmbajtje pa leje, për atë që njihet si “masakra e Çoles”.
Në prill të vitit 2015, në një lokal në lagjen “Çole”, pas një konflikti të armatosur për motive banale, u vranë Haki Rakipi, Alfred Velaj dhe Albi Lima.
Për këtë ngjarje u arrestua Aleksandër Llanaj, i cili u dënua me burgim të përjetshëm. Ndërsa 35 vjet u dhanë për Ani Begajn dhe Bertil Alliajn, i cili kishte mundur t’i shpëtonte drejtësisë, duke qëndruar në arrati prej 10 vitesh.
Bertil Alliaj u arrestua në malet e fshatit Gjorm pas disa orë kërkimesh nga policia pas ngjarjes së rëndë. Përmes një njoftimi, Policia sqaroi se ishte sekuestruar edhe arma e zjarrit pistoletë, e dyshuar si e përdorur në këtë ngjarje, së bashku me 10 fishekë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
