ADN e lashtë identifikon shkaktarin e pandemisë së parë në botë

Nga Gazeta “SI”- Pandemia e parë në botë, e njohur si Murtaja e Justinianit sipas perandorit bizantin në atë kohë, vrau një numër të llogaritur prej 25 deri në 100 milion njerëz midis viteve 541 dhe 750 pas Krishtit.

Shkencëtarët kanë spekuluar prej kohësh për shkakun e shpërthimit dhe për vendin ku ka nisur, megjithëse burimet historike nga periudha tregojnë se mund të ketë filluar rreth Pelusiumit në Egjipt, para se të përhapej shpejt në Lindjen e Mesme dhe botën mesdhetare.

Sipas një deklarate të lëshuar nga Universiteti i Florida Jugore (USF), studiuesit morën pjesë në një studim ndërdisiplinor që ka zbuluar për herë të parë dëshmi direkte gjenomike që identifikojnë bakterin Yersinia pestis si shkakun e murtajës.

Ekipi analizoi material gjenetik nga tetë dhëmbë njerëzorë të marrë nga individë të varrosur në një varrezë masive të mesit të shekullit të gjashtë deri në fillim të shekullit të shtatë pas Krishtit, nën ish-hipodromin romak në Jerash, Jordan, një qytet vetëm 200 milje larg Pelusiumit të lashtë.

Studimi tregoi se viktimat e murtajës mbartnin shtame pothuajse identike të Y. pestis, duke konfirmuar për herë të parë se mikrobi ishte i pranishëm brenda Perandorisë Bizantine midis viteve 550 dhe 660 pas Krishtit.

“Për shekuj me radhë, ne kemi mbështetur vetëm në shkrime që përshkruanin një sëmundje shkatërruese, por nuk kishim asnjë dëshmi të fortë biologjike për praninë e murtajës,” tha studiuesi i USF, Rays H.Y. Jiang. “Gjetjet tona ofrojnë copën e munguar të këtij puzzle, duke ofruar për herë të parë një dritare direkte gjenetike për mënyrën se si kjo pandemi përshkoi zemrën e perandorisë.”

Yersinia pestis ishte gjithashtu përgjegjëse për Murtajën e Zezë, e cila mund të ketë shkatërruar deri në 50 për qind të popullsisë së Europës në shekullin e 14-të.

Burimi: Archaeology Magazine

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.